देशका विभिन्न स्थानबाट मृत अवस्थामा ४ जना फेला परेका छन् । खोटाङ, दिक्तेल रुपाकोट मझुवागढी नगरपालिका-२ मुडेस्थित राज कुमार तामाङको घरमा सिराहा लौकिया महियानी गाउँपालिका घर भएका ४० वर्षीय कासिन्दर सदा बिहीबार मृत अवस्थामा फेला परेका छन् ।

मुडेस्थित नयाँ बन्दै गरेको भवनमा लेवरको काम गर्ने सदा सुतेकै ठाउँमा मृत अवस्थामा फेला परेका छन् । त्यस्तै बागलुङ, बागलुङ नगरपालिका-१४ कैयापुल मुनी कालिगण्डकी नदीको किनारमा जैमिनी नगरपालिका-७ जैदी बस्ने ३२ वर्षीया सिता नेपाली शुक्रबार मृत अवस्थामा फेला परेकी छन् ।

यस्तै अर्घाखाँची, शितगंगा नगरपालिका-१४ ढावा डेरा गरी बस्दै निर्माण सेवामा काम गर्ने प्युठान नौबैनी गाउँपालिका-८ फाफली घर भएका ५५ वर्षीय भुपल पुन आफ्नै कोठामा शुक्रबार मृत अवस्थामा फेला परेका छन् । यता पर्सा, जिराभवानी गाउँपालिका-१ बलवा बस्ने ६० वर्षीय नवि मियाँ सोही ठाउँस्थित चमरी खोलामा शुक्रबार मृत अवस्थामा फेला परेका छन् । बुधबारदेखि सम्पर्कमा नआएको भन्ने खबर प्राप्त हुनासाथ प्रहरी चौकी महादेवपट्टीबाट खटिएको प्रहरीले खोजी गर्ने क्रममा उक्त खोलामा उनको शव फेला परेको हो । यस सम्बन्धमा प्रहरीले आवश्यक अनुसन्धान गरिरहेको छ ।