देशका विभिन्न स्थानबाट मृत अवस्थामा ७ जना फेला परेका छन् । दार्चुला, ब्यास गाउँपालिका-१ भोलुम भन्ने स्थानको खोल्सामा दुहुँ गाउँपालिका-४ पोक्से बस्ने १८ वर्षीय प्रबिण कुँवर र हाल नाम, थर, वतन खुल्न नसकेका २ जना महिलाको शव बुधबार फेला परेको छ ।

उक्त स्थानमा यार्सागुम्बा संकलन गर्न गएका ४/५ जना ब्यक्तिहरु मंगलबार दिउँसो हिमपहिरोमा परी बेपत्ता भएको भन्ने खबर प्राप्त हुनासाथ प्रहरी चौकी सितापुल, सशस्त्र प्रहरी बल नेपाल तथा स्थानीयहरूको सहयोगमा खोजी गर्ने क्रममा बेपत्ता भएकामध्ये ३ जनाको शव फेला पारेको हो ।

त्यस्तै ललितपुर, महालक्ष्मी नगरपालिका-२ को वडा कार्यालय नजिक आफ्नै दाईको कोठामा गत आइतबारदेखि बसेको कञ्चनपुर भिमदत्त नगरपालिका-घर भएका २२ वर्षीय पुष्पकमल खडायत आफू सुत्ने कोठामा बुधबार मृत अवस्थामा फेला परेका छन् ।

यस्तै बारा, सिम्रौनगढ नगरपालिका-७ खजानी बस्ने शिवनाथ कुश्वाहाको तरकारी बारीमा हाल नाम, थर, वतन नखुलेका अन्दाजी ३५ वर्षीय पुरुष बुधबार मृत अवस्थामा फेला परेका छन् । यता धनुषा, जनकनन्दनी गाउँपालिका-४ खजुरी मुसहर टोल बस्ने ४० वर्षीय राजु सदा आफनै घर पछाडि मंगलबार मृत अवस्थामा फेला परेका छन् ।

यसैगरी धनुषा, जनकपुर उपमहानगरपालिका-१७ जनकपुर यदुकुवा हुलाकी सडक खण्डमा हाल नाम, थर, वतन नखुलेका करिब २८ वर्षीय पुरुष मंगलबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको छ ।