देशका विभिन्न स्थानबाट मृत अवस्थामा ८ जना फेला परेका छन्  । काभ्रे, सल्ले भुम्लु गाउँपालिका-१० बरकोटस्थित सुनकोशी नदीको किनारमा सिन्धुपाल्चोक चौतारा साँगाचोक गढी नगरपालिका-६ बस्ने ७५ वर्षीया इन्द्र कुमारी थापा मगर मंगलबार मृत अवस्थामा फेला परेकी छन् ।

त्यस्तै बर्दिया, राजापुर नगरपालिका-१ टिउनीस्थित भदाली नालामा हाल नाम, थर, वतन नखुलेका ४० वर्षीय पुरुष र सोही नगरपालिका-१ मुर्गहवा घाटस्थित कर्णाली नदीको किनारमा हाल नाम, थर, वतन नखुलेका करिब ३५ वर्षीय पुरुष मंगलबार मृत अवस्थामा फेला परेका छन् ।

यस्तै बागलुङ, बागलुङ नगरपालिका-१३ कालाखोलास्थित कालीगण्डकी नदीको किनारमा पर्वत जलजला गाउँपालिका घर भएकी ३६ वर्षीया पार्वती परीयार मंगलबार मृत अवस्थामा फेला परेकी छन् । यता पाँचथर, कुमायक गाउँपालिका-४ तिङदेन बस्ने ५२ वर्षीय लेखनाथ खनाल आफ्नै घरमा मंगलबार मृत अवस्थामा फेला परेका छन् ।

त्यसैगरी बाँके, बैजनाथ गाउँपालिका-८ पिपरी बस्ने ६८ वर्षीय शिव बहादुर खत्री सोही ठाउँस्थित जेठीनाला पुलको मुनी किनारामा मंगलबार मृत अवस्थामा फेला परेका छन् । उता पाल्पा, तिनाउ गाउँपालिका-५ हिउदेखोलास्थित आफन्तको घरमा बस्दै आएका सोही गाउँपालिका-६ मस्याम घर भएका ६५ वर्षीय सहबिर नेपाली सोही ठाउँस्थित हिउँदेखोला नजिकै भिरमा सोमबार मृत अवस्थामा फेला परेका छन् । जेठ ६ गते घरबाट हिँडि बेपत्ता भएका उनको खोजी गर्ने क्रममा उक्त स्थानमा शव फेला परेको हो ।

यता बारा, कलैया उपमहानगरपालिका-२७ पर्सा टोल मिर्ती खोला बस्ने ३६ वर्षीय पवन कुमार कुसवाहा सोही ठाउँस्थित मिर्ती खोलामा सोमबार मृत अवस्थामा फेला परेका छन् । यस्तै बझाङ, छबिसपाथिभेरा गाउँपालिका-१ जालेबगरस्थित सेती नदीको किनारमा हाल नाम, थर, वतन नखुलेकी अन्दाजी ४ वर्षीया बालिका सोमबार मृत अवस्थामा फेला परेकी छिन् । यस सम्बन्धमा प्रहरीले थप अनुसन्धान गरिरहेको छ ।