देशका विभिन्न स्थानबाट मृत अवस्थामा ८ जना फेला परेका छन् । काठमाडौं महानगरपालिका-११ सुन्धारास्थित भेनस क्लबको पार्किङमा सोही ठाउँ बस्ने काठमाडौं महानगरपालिका-१९ ढोकाटोल घर भएका ५० वर्षीय कालु शाही आइतबार मृत अवस्थामा फेला परेका छन् ।

त्यस्तै धनुषा, मिथिला नगरपालिका-६ कृषिबजारस्थित चौतारीमा ढल्केबरस्थित श्रीराम होटल एण्ड लजमा काम गर्ने सिन्धुली दुधौली नगरपालिका-२ भलुही बस्ने ३८ वर्षीय खिलनाथ अधिकारी आइतबार मृत अवस्थामा फेला परेका छन् ।

यस्तै मोरङ, कानेपोखरी गाउँपालिका-२ चिसाङ खोलास्थित चिसाङघाटको मलामी आराम गर्ने कोठामा विगत ३ वर्षदेखि बस्दै आएका हाल नाम, थर, वतन नखुलेका अन्दाजी ६५ वर्षीय पुरुष आइतबार मृत अवस्थामा फेला परेका छन् ।

यता सुनसरी, बराहक्षेत्र नगरपालिका-७ देविघाट बस्ने ८१ वर्षीया मनमाया आचार्य सोही नगरपालिका-६ पहिरोस्थित आफ्नै बारीमा शनिबार मृत अवस्थामा फेला परेकी छन् । यसैगरी धनुषा, क्षिरेश्वरनाथ नगरपालिका-५ स्थित ऐभरेष्ट पेपरमिल दुधमतीमा पेपर फिनिसरको काम गरी बस्ने भारत दरभंगा घर भएका ६५ वर्षीय नन्दकिशोर यादव आफ्नो क्वार्टरको बाहिर खाटमा शनिबार मृत अवस्थामा फेला परेका छन् ।

उता खोटाङ, खोटेहाङ गाउँपालिका-९ रिट्ठाबोटेस्थित सुनकोशी नदीको किनारमा उदयपुर रौतामाई गाउँपालिका-३ लाफागाउँ बेलबोटे बस्ने ज्ञानेन्द्र बस्नेतकी छोरी १० वर्षीया समिक्षा बस्नेत शनिबार मृत अवस्थामा फेला परेकी छिन् । बिहीबार बिहान उदयपुर रौतामाई गाउँपालिका-३ जिमिरेस्थित सुनकोशी नदीमा पौडी खेल्ने क्रममा नदीले बगाई बेपत्ता भएकी उनको खोजी गर्ने क्रममा शव फेला परेको हो ।

त्यसैगरी पाँचथर, तुम्बेवा गाउँपालिका-२ कुसुमेस्थित तमोर नदीमा हाल, नाम, थर, वतन नखुलेका पुरूष शनिबार मृत अवस्थामा फेला परेका छन् । यस्तै सप्तरी, सुरुङगा नगरपालिका-५ कुशहा बेल्ही सडकमा हाल नाम, थर, वतन नखुलेका अन्दाजी ६५ वर्षीय पुरुष शनिबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको छ ।