देशका छुट्टाछुट्टै स्थानमा भएको  सवारी दुर्घटनामा चार जनाको मृत्यु भएको छ । कपिलवस्तु, बुद्धभूमि नगरपालिका-९ ईमिलीयामा ना.६ ख ६२७६ नम्बरको ट्रक र बा.प्र.०३-००१ ख १७५१ नम्बरको ट्रक एक आपसमा ठक्कर खाई मंगलबार बिहान दुर्घटना हुँदा बा.प्र.०३-००१ ख १७५१ नम्बरको ट्रकको सह-चालक मकवानपुर हेटौंडाउपमहानगरपालिका-११ ज्ञानसिम्ठा बस्ने २८ वर्षीय अर्जुन घलानको मृत्यु भएको छ ।

दुर्घटनामा गम्भीर घाइते भएका उनको जिल्ला अस्पताल तौलिहवामा उपचारको क्रममा मृत्यु भएको हो । साथै दुर्घटनामा घाइते भएका दुवै ट्रकका चालकलाई उपचारको लागि बुटवलतर्फ पठाइएको छ । त्यस्तै सिन्धुपाल्चोक, हेलम्बु गाउँपालिका-४ ग्याल्थुङमा बा.४ ख ८७ नम्बरको आईचर गाडीको ठक्करबाट सोही गाउँपालिका बराम्चे बस्ने श्याम बहादुर तामाङको छोरा ८ वर्षीय सनिस तामाङको मंगलबार बिहान मृत्यु भएको छ ।

ठक्करबाट गम्भीर घाइते भएका उनको मेलम्ची नगर अस्पतालमा उपचारको क्रममा मृत्यु भएको हो । हाल फरार गाडी चालकको प्रहरीले खोजी गरिरहेको छ । यता सर्लाही, इश्वरपुर नगरपालिक-९ खोरिया टोलमा ज.२ प ६४५२ नम्बरको मोटरसाइकललाई बीआर ३० ई २४५९ नम्बरको स्कारपिओ गाडीले ठक्कर दिँदा मोटरसाइकल चालक चन्द्रनगर गाउँपालिका-२ बबरगंज बस्ने ४५ वर्षीय मनोज महतोको मंगलबार दिउँसो मृत्यु भएको छ ।

ठक्करबाट गम्भीर घाइते भएका उनको मोडेल अस्पताल लालगढ धनुषामा उपचारको क्रममा मृत्यु भएको हो । हाल फरार गाडी चालकको प्रहरीले खोजी गरिरहेको छ । यस्तै काठमाडौं महानगरपालिका-१४ बल्खुमा लु.१ प ३९८५ नम्बरको हाईड्रो क्रेनको ठक्करबाट पैदलयात्री हाल नाम, थर, वतन नखुलेकी अन्दाजी ५० वर्षीया महिलाको मंगलबार दिउँसो मृत्यु भएको छ ।

ठक्करबाट गम्भीर घाइते भएकी उनको बयोधा अस्पताल बल्खुमा उपचारको क्रममा मृत्यु भएको हो । क्रेन चालकलाई प्रहरीले नियन्त्रणमा लिएको छ । यस सम्बन्धमा प्रहरीले थप अनुसन्धान गरिरहेको छ ।