देशका छुट्टाछुट्टै स्थानमा भएको  सवारी दुर्घटनामा चार जनाको मृत्यु भएको छ । बाग्लुङ, काठेखोला गाउँपालिका-५ ठुल्ढुङगामा ग.१ च ९४८५ नम्बरको जिप सडकबाट करिब ५ सय मिटर तल खसेर बुधबार बिहान दुर्घटना हुँदा २ जनाको घटनास्थलमै मृत्यु भएको छ ।

मृत्यु हुनेहरुमा गाडीमा सवार जैमिनी नगरपालिका-१० राङखानी घर भई हाल बाग्लुङ नगरपालिका-२ श्रीनगरटोल बस्ने ३७ वर्षीय दुर्गा पौडेल र गाडी चालक पर्वत जलजला गाउँपालिका-६ सालिजा घर भएका ३१ वर्षीय राजेन्द्र भन्ने रामचन्द्र पुन रहेका छन् ।

त्यस्तै कास्की, पोखरा महानगरपालिका-२५ हेम्जा चाक्ले कुनामा ध.१ ज ९५२ नम्बरको ट्याक्सीको ठक्करबाट सोही महानगरपालिका-२५ हेम्जा म्याग्दी चोक बस्ने मुस्ताङ घर भएकी १३ वर्षीया रेखा लामघारेको बुधबार बिहान मृत्यु भएको छ । ठक्करबाट गम्भीर घाइते भएका उनको फिस्टेल अस्पतालमा उपचारको क्रममा मृत्यु भएको हो । ट्याक्सी चालकलाई प्रहरीले नियन्त्रणमा लिएको छ ।

यस्तै तनहुँ, आँबुखैरेनी गाउँपालिका-२ एक्लेफाँटमा बा.७० प ९४७४ नम्बरको मोटरसाइकलले ना.६ ख ३०१६ नम्बरको ट्रकलाई ओभरटेक गर्ने क्रममा बुधबार बिहान दुर्घटना हुँदा मोटरसाइकलना सवार लम्जुङ सुन्दरबजार नगरपालिका-९ बस्ने ५८ वर्षीय चन्द्र बहादुर गुरुङको घटनास्थलमै मृत्यु भएको छ ।

साथै दुर्घटनामा घाइते भएका मोटरसाइकल चालकको आबुँखैरेनी अस्पताल तनहुँमा उपचार भइरहेको छ । ट्रकचालकलाई प्रहरीलाई नियन्त्रणमा लिएको छ । यस सम्बन्धमा प्रहरीले थप अनुसन्धान गरिरहेको छ ।