देशका विभिन्न स्थानबाट मृत अवस्थामा ५ जना फेला परेका छन् । ताप्लेजुङ, आठराई त्रिवेणी गाउँपालिका-१ निगुरादिनस्थित लिम्बुनी पुल जाने बाटोमा सोही गाउँपालिका-२ फुलबारी बस्ने ४२ वर्षीय राजेन्द्र बराईली शनिबार मृत अवस्थामा फेला परेका छन् ।

त्यस्तै झापा, भद्रपुर नगरपालिका-८ जनता चोकस्थित एसियन प्लाईउड फ्याक्ट्रीमा काम गरी बस्ने भारत किसानगंज गलगलिया-३ भादगाउँ घर भएका ५३ वर्षीय मोहमद हफिज उदीन सोही फ्याक्ट्रीमा शनिबार मृत अवस्थामा फेला परेका छन् । यता दोलखा, जिरी नगरपालिका-६ सिजेल बस्ने ६८ वर्षीय सुबत बहादुर कार्की सोही ठाउँस्थित चौरमा शनिबार मृत अवस्थामा फेला परेका छन् ।

यस्तै रौतहट, चन्द्रपुर नगरपालिका-९ चाँदी खोलाको मलिनटोलको बगरमा हाल नाम, थर, वतन नखुलेकी महिला शनिबार मृत अवस्थामा फेला परेकी छिन् । उता गुल्मी, मालिका गाउँपालिका-२ च्यानडाँडा बस्ने ४१ वर्षीय लिल बहादुर घर्ती सोही ठाउँस्थित खोल्सामा शनिबार मृत अवस्थामा फेला परेका छन् ।

लिल बहादर र उनकै छोरी ८ वर्षीया बिन्दु घर्ती बुवासँग भेटघाट गरी ससुराली घर फर्कने क्रममा सोही ठाउँस्थितचिप्लेपहराको खोल्सामा आएको भलले बगाई गोरेटो बाटोबाट करिब ८० मिटर तल उनको शव फेला परेको हो । साथै भलले बगाई बेपत्ता भएकी भन्ने खबर प्राप्त हुनासाथ प्रहरी चौकी पौदीअमराई र प्रहरी चौकी वामीटक्सारबाट खटिएको प्रहरीले बिन्दुको खोजी गरिरहेको छ । यस सम्बन्धमा प्रहरीले थप अनुसन्धान गरिरहेको छ ।