देशका विभिन्न स्थानबाट मृत अवस्थामा ५ जना फेला परेका छन् । बारा, निजगढ नगरपालिका-९ खयर घारी जंगलमा रौतहट गुजरा नगरपालिका-३ बस्ने मान बहादुर थापा मगर मंगलबार मृत अवस्थामा फेला परेका छन् ।

त्यस्तै बाँके, नेपालगंज उपमहानगरपालिका-१९ आलानगरस्थित डुडुवा नालामा हाल नाम, थर, वतन नखुलेका ४० वर्षीय पुरुष मंगलबार मृत अवस्थामा फेला परेका छन् । यता संखुवासभा, सभापोखरी गाउँपालिका-४ सनेम बस्ने ४६ वर्षीय आईतराज लिम्बु सोही ठाउँस्थित याक्सुवा खोलामा मंगलबार मृत अवस्थामा फेला परेका छन् ।

यस्तै सर्लाही, बरहथवा नगरपालिका-९ मुर्तिया बस्ने प्रेम बहादुर राना मगरको छोरा ५ वर्षीय अंकृत राना मगर आफ्नै घरदेखि ८ सय मिटर टाढा पानी जमेको खाल्टोमा सोमबार मृत अवस्थामा फेला परेका छन् । उता दार्चुला, नौगाड गाउँपालिका-१ रङरङे बस्ने ५२ वर्षीय मान बहादुर बम सोही गाउँपालिका-२ खलपुजा धार भन्ने स्थानमा सोमबार मृत अवस्थामा फेला परेका छन् ।

घरबाट सदरमुकाम खलंगातर्फ जान्छु भनी हिँडेका उनी घर नफर्किएपछी खोजी गर्ने क्रममा उक्त स्थानमा उनको शव फेला परेको हो । यस सम्बन्धमा प्रहरीले आवश्यक अनुसन्धान गरिरहेको छ ।