देशका विभिन्न स्थानबाट मृत अवस्थामा ९ जना फेला परेका छन् । भोजपुर, षडानन्द नगरपालिका-४ साङ्राङ बस्ने हेम बहादुर सुनारको घरमा सोही नगरपालिका-१३ वेखम्छा बस्ने ६५ वर्षीय दिल बहादुर सुनार बिहीबार मृत अवस्थामा फेला परेका छन् ।

यसैगरी भोजपुर, षडानन्द नगरपालिका-८ गौरिगाँउ बस्ने ६१ वर्षीय बुद्दी श्रेष्ठ आफ्नै गोठमा बिहीबार मृत अवस्थामा फेला परेका छन् । यता कैलाली, कैलारी गाउँपालिका-७ बस्ने ३८ वर्षीय गणेश चौधरी सोही ठाउँस्थित कटैनी खोलाको किनारमा बिहीबार मृत अवस्थामा फेला परेका छन् ।

त्यस्तै सिन्धुपाल्चोक, चौतारा साँगाचोक गढी नगरपालिका-११ नर्सरी गैराथोक बस्ने ४० वर्षीय श्याम गिरी सोही ठाउँ बस्ने मैना गिरीको बारीमा बिहीबार मृत अवस्थामा फेला परेका छन् । उता सिरहा, नरहा गाउँपालिका-३ सव डिभिजन वन कार्यालय नजिक पुर्व पश्चिम लोक मार्गमा हाल नाम, थर, वतन नखुलेको साईकलयात्री अन्दाजी ६० वर्षीय पुरुष बिहीबार मृत अवस्थामा फेला परेका छन् ।

यस्तै सुर्खेत, बराहताल गाउँपालिका-४ तरंगास्थित भेरी नदिको किनारामा हाल नाम, थर, वतन नखुलेको पुरुष बिहीबार मृत अवस्थामा फेला परेका छन् । त्यस्तै डोल्पा, शे-फोक्सुण्डो गाउँपालिका-८ डेकुथाङ भन्ने स्थानमा हाल नाम, थर, वतन नखुलेका पुरुष बुधबार मृत अवस्थामा फेला परेका छन् ।

यता रुपन्देही, बुटवल उपमहानगरपालिका-६ पुरानो बसपार्कस्थित प्रतिक्षालयमा गुल्मी धुर्कोट गाउँपालिका-३ घर भई बुटवलमा कवाड संकलन गरी हिड्ने ५५ वर्षीय कृष्ण गौतम बुधबार मृत अवस्थामा फेला परेका छन् । यसैगरी रामेछाप, दोरम्बा शैलुङ गाउँपालिका-३ टोकरपुर बस्ने ४१ वर्षीय गणेश पाठक सोही गाउँपालिका-५ सल्लेनी भिरमा बुधबार मृत अवस्थामा फेला परेका छन् ।

गत शनिबार बिहान घरबाट खेतमा पानी लगाउन जान्छु भनि हिँडेका उनी घर नफर्किएपछि खोजी गर्ने क्रममा शव फेला परेको हो । यस सम्बन्धमा प्रहरीले आवश्यक अनुसन्धान गरिरहेको छ ।