मकवानपुरमा दुई ट्रक एकापसमा ठक्कर खाई दुर्घटना हुँदा तीन जनाको मृत्यु भएको छ भने दुई जना घाइतेको भएका छन्  । आज(शनिबार) बिहान पौने २ बजे मनहरी गाउँपालिका–६ नयाँबस्ती डिपाट गाउँस्थित पूर्व पश्चिम सडकखण्डमा हेटौँडाबाट चितवनतर्फ आउँदै गरेको ना६ख ६६६७ नंको ट्रक र विपरीत दिशातर्फबाट जाँदै गरेको ना६ख ६३१ नंको ट्रक एकापसमा ठक्कर खाई दुर्घटना भएको हो ।

उक्त दुर्घटना हुँदा दुवै ट्रकमा आगलागी भएको जिल्ला प्रहरी कार्यालय मकवानपुरका प्रहरी नायब उपरीक्षक टेकबहादुर कार्कीले बताए । त्यस्तै दुर्घटनामा पारी मृत्यु हुनेमा ना६ख ६६६७ नंको ट्रक चालक जिल्ला चितवन राप्ति नपा ८ बस्ने वर्ष २८ को रिहान रुम्बा तामाङ, सहचालक जिल्ला गोरखा गण्डकी गापा २ गोर्दीटार बस्ने वर्ष २१ को सुमन चेपाङ र ना६ख ६३१ नंको ट्रक सहचालक जिल्ला मकवानपुर मनहरी गापा ३ बस्ने वर्ष २० को अमृत प्रजा रहेका छन् ।

यस्तै दुर्घटनामा परी दुई जना घाइते भएका छन् । घाइते हुनेमा ना६ख ६६६७ नको ट्रकमा सवार जिल्ला चितवन राप्ति नपा ३ बस्ने वर्ष ३५ को विवेक तमाङ र ना६ख ६३१ नंको ट्रक चालक जिल्ला मकवानपुर मनहरी गापा ३ बस्ने वर्ष ३२ को अर्जुनकुमार प्रजा रहेको प्रजरीले जनाएको छ ।

आगलागी भएको ट्रकको आगो निभाउन हेटौँडाबाट दुई वटा दमकलको सहायतले आगो निभाए पनि ट्रक पूर्णरुपमा जलेको प्रहरीले जनाएको छ ।