नवकान्तिपुर संवाददाता
काठमाडौं, २३ असार ।
नेपाली कांग्रेसका महामन्त्री गगनकुमार थापाले आफू वा आफ्नै पुस्ताको व्यक्ति प्रधानमन्त्री बन्नु देशको वर्तमान आवश्यकता भएको बताएका छन् । शनिबार नेपाली कांग्रेस बुढानिलकण्ठ नगरपालिकाको नगर सम्मेलनमा बोल्दै उनले यस्तो बताएका हुन् ।
उनले संसदीय दलको नेता बदल्ने कुरामा लाग्ने भन्दै सके आफू प्रधानमन्त्री बन्ने यदि यो सम्भव नभए आफ्नै पुस्तालाई प्रधानमन्त्री बनाउने बताए । ‘म फेरि संसदीय दलको नेता बदल्ने कुरामा लाग्छु, सके म प्रधानमन्त्री बन्छु नसके मेरो पुस्ताको कसैलाई प्रधानमन्त्री बनाउँछु’ महामन्त्री थापाले भने ।
उनले कांग्रेसलाई बदल्नका लागि आफू लागेको स्पष्ट पारे । ‘हामी कांग्रेसमा छौँ, कांग्रेसलाई बदल्नका लागि लाग्नुपर्छ, कांग्रेस बदल्नका लागि मैले संसदीय दलको नेतामा उम्मेदवारी दिएको हुँ’, उनले भने ।
त्यस्तै कांग्रेस नेता प्रदीप पौडेलले अहिलेकै अवस्था रहने हो भने आगामी निर्वाचन कांग्रेसले जित्न नसक्ने दाबी गरे । उनले सरकारमा रहेका मन्त्रीहरुले जनताका पक्षमा काम गर्न आग्रहसमेत गरे। उनले सामाजिक सञ्जालमा रिस उठ्दैमा पार्टीका लागि र पार्टीका नेताका बारेमा नराम्रो नलेख्न आग्रह गरे ।
