देशका छुट्टाछुट्टै स्थानमा भएको सवारी दुर्घटनामा तीन जनाको मृत्यु भएको छ । बारा, जितपुरसिमरा उपमहानगरपालिका-२३ भलुहीमा प्र.२-०३-०१८ प ९०६ नम्बरको मोटरसाइकल अनियन्त्रित भई सोमबार दिउँसो दुर्घटना हुँदा मोटरसाइकलमा सवार पर्सा बहुदधुरामाई नगरपालिका-९ बिश्रामपुर बस्ने २३ वर्षीय बिजय शर्माको मृत्यु भएको छ ।

दुर्घटनामा गम्भीर घाइते भएका उनको बयोधा अस्पताल गण्डकमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ । यसैगरी बारा, जितपुरसिमरा उपमहानगरपालिका-५ बकुलियामा ना.१ ज ५०३१ नम्बरको सुमोको ठक्करबाट पैदलयात्री सोही उपमहानगरपालिका-७ बिसौलिया बस्ने २८ वर्षीय लाल मुखियाको सोमबार राति मृत्यु भएको छ ।

ठक्करबाट गम्भीर घाइते भएका उनको बयोधा अस्पताल गण्डकमा उपचारको क्रममा मृत्यु भएको हो । सुमो चालकलाई प्रहरीले नियन्त्रणमा लिएको छ । त्यस्तै बागलुङ, बडिगाड गाउँपालिका-७ स्थित सडकमा कच्ची सडक खण्ड खन्न प्रयोग भएको जेसिबी डोजरको ठक्करबाट सोही ठाउँ बस्ने भान बहादुर घर्तीको छोरा १४ वर्षीय सुनिल घर्तीको सोमबार दिउँसो घटनास्थलमै मृत्यु भएको छ ।

जेसिबी चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले थप अनुसन्धान गरिरहेको छ ।