देशका विभिन्न स्थानबाट मृत अवस्थामा ५ जना फेला परेका छन् । दैलेख, नौमुले गाउँपालिका-८ चौराठा बस्ने ४९ वर्षीया लक्ष्मी रिमाल सोही ठाउँस्थित झिम्पेखोलामा बिहीबार मृत अवस्थामा फेला परेकी छन् । नारायण नगरपालिका-७ स्थित गोरेटोबाट घर जाने क्रममा चिप्लिएर झिम्पेखोलामा खस्न गई खोलाले बगाएको भन्ने खबर प्राप्त हुनासाथ जिल्ला प्रहरी कार्यालय दैलेख र अस्थायी प्रहरी पोष्ट लोहरेखोलाबाट खटिएको प्रहरीले खोजी गर्ने क्रममा उनको शव फेला परेको हो ।

त्यस्तै भक्तपुर, सूर्यबिनायक नगरपालिका-७ गुण्डु बस्ने ३८ वर्षीया माया नगरकोटी सोही ठाउँस्थित जंगलमा बिहीबार मृत अवस्थामा फेला परेकी छन् । असार १३ गतेदेखि हराइरहेकी उनको खोजी गर्ने क्रममा शव फेला परेको हो ।

यस्तै झापा, गौरादह नगरपालिका-६ टगुवास्थित रतुवा खोलाको बगरमा टगुवा घर भई हाल दमक नगरपालिका-४ ताराबारी बस्ने ६५ वर्षीय भागवत शर्मा बिहीबार मृत अवस्थामा फेला परेका छन् । यता कपिलवस्तु, बुद्धभूमि नगरपालिका-१० लोहरौलास्थित पुलको छेउमा कपिलवस्तु नगरपालिका-११ बस्ने ५६ वर्षीय आशुतोष कुमार अग्रहरी बिहीबार मृत अवस्थामा फेला परेका छन् ।

यता सुनसरी, धरान उपमहानगरपालिका-८ हिमाली सामुदायिक वनभित्र खोल्सामा हाल नाम, थर, वतन नखुलेकी अन्दाजी ४५ वर्षीया महिला बिहीबार मृत अवस्थामा फेला परेकी छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।