देशका विभिन्न स्थानबाट मृत अवस्थामा ७ जना फेला परेका छन् । तनहुँ, ब्यास नगरपालिका-१० बोटेगाँउ बैरेनीस्थित मादी नदीको किनारमा हाल नाम, थर, वतन नखुलेका अन्दाजी ५० वर्षीय पुरुष शुक्रबार मृत अवस्थामा फेला परेका छन् ।

त्यस्तै नवलपरासी (पूर्व), गैंडाकोट नगरपालिका-१३ शिखरौलीस्थित नारायणी नदीमा हाल नाम, थर, वतन, नखुलेकी अन्दाजी ५० वर्षीया महिला शुक्रबार मृत अवस्थामा फेला परेकी छन् । यस्तै नवलपरासी (पश्चिम), रामग्राम नगरपालिका-५ स्थित राना फास्ट फुड होटल संचालन गरी बस्ने पर्वत पैयूं गाउँपालिका-७ भोर्ले घर भएका ३६ वर्षीय टेक बहादुर राना सोही होटलको आफु सुत्ने कोठामा शुक्रबार मृत अवस्थामा फेला परेका छन् ।

यता ताप्लेजुङ, सिरिजंगा गाउँपालिका-३ ओर्पा घर भई फुङलिङ नगरुपालिका-५ बुद्ध चोकमा डेरा गरी बस्ने ५२ वर्षीया सृजना लिम्बु आफ्नै कोठामा शुक्रबार मृत अवस्थामा फेला परेकी छन् । यसैगरी जाजरकोट, नलगाड नगरपालिका-१ बस्ने ३८ वर्षीय हरिस बिक सोही ठाउँस्थित कोदेको जंगलमा भीरबाट खसेर मृत्यु भएको अवस्थामा शुक्रबार फेला परेका छन् ।

त्यसैगरी सप्तरी, हनुमाननगर कंकालीनी नगरपालिका-१० बस्ने १९ वर्षीय तिर्थ नारायण मण्डल तिलाठी कोईलाडी गाउँपालिका-७ सापुरस्थित सडकको छेउमा शुक्रबार बिहान मृत अवस्थामा फेला परेका छन् । सडक छेउको खाल्डोमा गाडेको अवस्थामा शव फेला परेको भन्ने खबर प्राप्त हुनासाथ मधेश प्रदेश केनाईन शाखा धनुषा र जिल्ला प्रहरी कार्यालय सप्तरी समेतबाट खटिएको संयुक्त टोलीले प्रारम्भिक अनुसन्धान सुरु गरेको छ ।

यस्तै मोरङ, केराबारी गाउँपालिका-६ स्थित नर्सरी जङ्गलमा हाल नाम, थर, वतन नखुलेका अन्दाजी २५ वर्षीय पुरुष बिहीबार मृत अवस्थामा पेला परेका छन् । घटनाका सम्बन्धमा प्रहरीले थप अनुसन्धान गरिरहेको छ ।