देशका छुट्टाछुट्टै स्थानमा भएको सवारी दुर्घटनामा तीन जनाको मृत्यु भएको छ । कैलाली, गोदावरी नगरपालिका-३ चौकिडाँडामा सु.प प्र.०१००२ त ६४१९ नम्बरको ट्याक्टर र सु.प प्र.०१०११ प ७३२० नम्बरको मोटरसाइकल एकआपसमा ठक्कर खाई आइतबार राति दुर्घटना हुँदा मोटरसाइकल चालक नेपाल प्रहरी विशेष सुरक्षा गण महेन्द्रनगर कञ्चनपुरमा कार्यरत प्रहरी जवान कपिल कठायतको आइतबार राति मृत्यु भएको छ ।

दुर्घटनामा गम्भीर घाइते भएका उनको सेती प्रादेशिक अस्पताल धनगढीमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार अस्थायी प्रहरी पोष्ट राजपुर डोटीमा कार्यरत प्रहरी जवान हेमराज डाउडालाई माया मेट्रो अस्पताल धनगढीमा उपचारको लागि पठाइएको छ । हाल फरार ट्याक्टर चालकको प्रहरीले खोजी गरिरहेको छ ।

त्यस्तै मकवानपुर, मनहरी गाउँपालिका-७ ज्यामिरेस्थित सडकमा बिग्रिएर रोकि राखेको ना.५ ख ७४७२ नम्बरको ट्रकमा ना. ५७ प २३१ नम्बरको मोटरसाइकल ठक्कर खाई आइतबार राति दुर्घटना हुँदा मोटरसाइकलमा सवार २ जनाको मृत्यु भएको छ । मृत्यु हुनेहरूमा मोटरसाइकल चालक सोही गाउँपालिका-९ बस्ने २२ वर्षीय शम्भु गिरी रमोटरसाइकलमा सवार सोही ठाउँ बस्ने २१ वर्षीय सुशील गिरी भन्ने उमेश गिरी रहेका छन् ।

दुर्घटनामा गम्भीर घाइते भएका उनीहरूको पुरानो मेडिकल कलेज भरतपुर चितवनमा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ । दुवै दुर्घटनाका सम्बन्धमा प्रहरीले थप अनुसन्धान गरिरहेको छ ।