देशका छुट्टाछुट्टै स्थानमा भएको सवारी दुर्घटनामा छ जनाको मृत्यु भएको छ । काठमाडौं, टोखा नगरपालिका-२ टोखा चण्डेश्वरी मन्दिर नजिक सडकमा बा.२५ प २९३७ नम्बरको मोटरसाइकलको ठक्करबाट पैदलयात्री खोटाङ घर भई काठमाडौं टोखा नगरपालिका-८ डेरा गरी बस्ने ५० वर्षीया कमला बस्नेतको शुक्रबार बिहान मृत्यु भएको छ ।

ठक्करबाट गम्भीर घाइते भएकी उनको शिक्षण अस्पताल महाराजगञ्जमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ । त्यस्तै महोत्तरी, बर्दिबास नगरपालिका-६ कृष्णटोलस्थित भित्री सडकमा बर्दिबासबाट पशुपतिनगरतर्फ जाँदै गरेको प्रदेश २-०२-००५ नम्बरको मोटरसाइकल आफै अनियन्त्रित भई शुक्रबार दिउँसो दुर्घटना हुँदा मोटरसाइकलमा सवार सोही नगरपालिका-९ पशुपतिनगर बस्ने ५० वर्षीया सुमित्रा देवीको मृत्यु भएको छ ।

दुर्घटनामा गम्भीर घाइते भएकी उनको बर्दिबासस्थित शुभस्वस्तिक अस्पतालमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ । यस्तै सिरहा, भगवानपुर गाउँपालिका-१ सिनुरियास्थित सडकमा स.७ प २१५९ नम्बरको मोटरसाइकल आफै अनियन्त्रित भई बिहीबार दिउँसो दुर्घटना हुँदा मोटरसाइकलमा सवार सोही गाउँपालिका-५ लालपुर बस्ने २५ वर्षीय पुजा कुमारी सिंहको मृत्यु भएको छ ।

दुर्घटनामा गम्भीर घाइते भएकी उनको सप्तऋषि अस्पताल लहानमा उपचारको क्रममा मृत्यु भएको हो । साथै दुर्घटनामा घाइते भएकी मोटरसाइकलमा सवार १ जनाको सोही अस्पतालमा उपचार भइरहेको छ । यता कैलाली, जानकी गाउँपालिका-३ नयाँ लायकपुर शिविरस्थित सडकमा साइकलबाट लडेर सोही ठाउँ बस्ने ६६ वर्षीय बुद्धिराम थारु गुरुवाको बिहीबार दिउँसो घटनास्थलमै मृत्यु भएको छ ।

उता बारा, जितपुर सिमरा उपमहानगरपालिका-२ स्थित सडकमा पथलैयाबाट सिमरातर्फ जाँदै गरेको ना.२३ प ७१८२ नम्बरको मोटरसाइकल बिहीबार राति दुर्घटना हुँदा चालक सोही उपमहानगरपालिका-७ जितपुर बस्ने १६ वर्षीय नौसाद कवारीको मृत्यु भएको छ ।

दुर्घटनामा गम्भीर घाइते भएका उनको बयोधा हस्पिटल गण्डक वीरगंजमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार अन्य ३ जनाको सोही अस्पतालमा उपचार भइरहेको छ । यस्तै सुर्खेत, वीरेन्द्रनगर नगरपालिका-३ उत्तरगंगास्थित सडकमा भुलेरी चोकबाट सदरमुकामतर्फ जाँदै गरेको क.प्र.००२ प १९७७ नम्बरको मोटरसाइकल अनियन्त्रित भई बिहीबार राति दुर्घटना हुँदा मोटरसाइकलमा सवार कालिकोट शुभकालिका गाउँपालिका-३ बस्ने २३ वर्षीय विमोचन विष्टको मृत्यु भएको छ ।

दुर्घटनामा गम्भीर घाइते भएका उनको कर्णाली प्रदेश अस्पताल कालागाउँमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालक समेत २ जनाको सोही अस्पतालमा उपचार भइरहेको छ ।दुर्घटनाका सम्बन्धमा प्रहरीले थप अनुसन्धान गरिरहेको छ ।