देशका विभिन्न स्थानबाट मृत अवस्थामा ६ जना फेला परेका छन् । दाङ, तुलसीपुर उपमहानगरपालिका-१२ क्वाई बस्ने ७२ वर्षीय कुलिया चौधरी सोही ठाउँस्थित आफ्नै खेतमा बिहीबार मृत अवस्थामा फेला परेका छन् । भदौ ५ गते घरबाट हराएका उनको खोजी गर्ने क्रममा शव फेला परेको हो ।

त्यस्तै धनकुटा, छथरजोरपाटी गाउँपालिका-६ सिधुवाबेसी बस्ने ४० वर्षीय पोष्ट बहादुर थापा आफ्नै घरको आँगनमा बिहीबार मृत अवस्थामा फेला परेका छन् । यता तेह्रथुम, लालीगुराँस नगरपालिका-८ एप्चेडाँडा बस्ने ४८ वर्षीय पदम लिम्बु सोही नगरपालिका-६ सुङनामस्थित लुभाङको भिरमा बिहीबार मृत अवस्थामा फेला परेका छन् ।

यस्तै मकवानपुर, भिमफेदी गाउँपालिका-८ माण्डुस्थित बागमती खोलामा हाल नाम, थर, वतन नखुलेकी अन्दाजी ४० वर्षीया महिला बिहीबार मृत अवस्थामा फेला परेकी छिन् । उता मोरङ, उर्लाबारी नगरपालिका-३ स्थित सालबारी सामुदायिक वनमा सोही नगरपालिका-७ बस्ने ६० वर्षीय गंगा बहादुर पौडेल बुधबार मृत अवस्थामा फेला परेका छन् । भदौ ४ गतेदेखि हराएका उनको खोजी गर्ने क्रममा शव फेला परेको हो ।

यसैगरी नवलपरासी पश्चिम, प्रतापपुर गाउँपालिका-९ स्थित गण्डक नहरमा हाल नाम, थर, वतन नखुलेका अन्दाजी २२ वर्षीय पुरूष बुधबार मृत अवस्थामा फेला परेका छन् । घटनाका सम्बन्धमा प्रहरीले आवश्यक अनुसन्धान गरिरहेको छ ।