देश छुट्टाछुट्टै स्थानमा भएको सवारी दुर्घटनामा दुई जनाको मृत्यु भएको छ । सुर्खेत, वीरेन्द्रनगर नगरपालिका-११ पिपिरा चोकमा रोकी राखेको क.प्र.०२०० प ४००४ नम्बरको स्कुटरमा भे.७ प ७७४६ नम्बरको मोटरसाइकल ठक्कर खाई मंगलबार राति दुर्घटना हुँदा मोटरसाइकल चालक सोही नगरपालिका-१२ बस्ने ४१ वर्षीय धर्म राज सापकोटाको मृत्यु भएको छ ।

दुर्घटनामा गम्भीर घाइते भएका उनको कर्णाली प्रदेश अस्पताल कालागाउँमा उपचारको क्रममा मृत्यु भएको हो । सामान्य घाइते भएका स्कुटर चालकलाई उपचार पश्चात प्रहरीले नियन्त्रणमा लिएको छ । त्यस्तै कास्की, पोखरा महानगरपालिका-१० अमरसिंह चोकमा ग.१० प ३५७६ नम्बरको मोटरसाइकलको ठक्करबाट पैदलयात्री हाल नाम, थर, वतन नखुलेकी अन्दाजी ३५ वर्षीया महिलाको बुधबार बिहान मृत्यु भएको छ ।

ठक्करबाट गम्भीर घाइते भएकी उनको मणिपाल अस्पतालमा उपचारको क्रममा मृत्यु भएको हो । दुर्घटनाका सम्बन्धमा प्रहरीले थप अनुसन्धान गरिरहेको छ ।