देशका विभिन्न स्थानबाट मृत अवस्थामा ५ जना फेला परेका छन् । भोजपुर, पौवादुङमा गाउँपालिका-१ स्थित दमार खोलामा सोही गाउँपालिका भिरकोट बस्ने ७० वर्षीय कटन बहादुर राई सोमबार मृत अवस्थामा फेला परेका छन् ।

त्यस्तै नवलपरासी पश्चिम, पाल्हिनन्दन गाउँपालिका-६ लंगडिपाकड बस्ने २७ वर्षीय चन्दन हरिजन बर्दघाट नगरपालिका-१२ भटौलियास्थित हुलासी खोलामा आइतबार मृत अवस्थामा फेला परेका छन् । यता बाजुरा, हिमाली गाउँपालिका-१ नेटा घर भई सोही नगरपालिका-१ बिच्छिया बजारमा होटल सञ्चालन गरी बस्ने तारा थापाकी छोरी १५ वर्षीया सर्पनशिला थापा सोही ठाउँस्थित बिच्छिया खोलाको बिच भागमा आइतबार मृत अवस्थामा फेला परेकी छिन् ।

शनिबारदेखि हराएकी उनको खोजी गर्ने क्रममा शव फेला परेको हो । यस्तै रूपन्देही, मायादेवी गाउँपालिका-७ स्थित घाँघर खोलामा हाल नाम, थर, वतन नखुलेका अन्दाजी ४० वर्षीय पुरूष आइतबार मृत अवस्थामा फेला परेका छन् ।

यसैगरी काठमाडौं महानगरपालिका-१८ डल्लुस्थित पुरानो पुलमा हाल नाम, थर, वतन नखुलेका अन्दाजी ३० वर्षीय पुरूष आइतबार मृत अवस्थामा फेला परेका छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।