नवकान्तिपुर संवाददाता
काठमाडौं, ३१ भदौ ।
नेपाली कांग्रेसका महामन्त्री विश्वप्रकाश शर्माले भ्रष्टाचारको विषयमा सरकारले पुराना फाइलमात्र होइन, फायर नै खोल्नुपर्ने बताएका छन् । शनिबार झापा क्षेत्र नं १ को क्षेत्रीय सम्मेलनमा बोल्दै शर्माले यस्तो बताएका हुन् ।
उनले नेपाली कांग्रेस भ्रष्टाचारमुक्त समाज बनाउन चाहने उल्लेख गर्दै पार्टी चलाउने शैलीमा नवीनताको आवश्यकता औँल्याए । महामन्त्री शर्माले पार्टीमा भइरहेका गल्ती–कमजोरीको सबै दोष आफूहरूले नलिने भन्दै सरकारले भ्रष्टाचार नियन्त्रणका लागि चालेको हरेक कदममा पार्टीको समर्थन रहेको बताए ।
उनले भने, ‘कांग्रेसले कसैलाई निलम्बन गर्यो वा गरेन त्यो ठूलो कुरा होइन, यस्तो हल्ला गर्नुको अर्थ पनि छैन । भ्रष्टाचारको फाइलमात्र होइन, फायर खोलिनुपर्छ ।’
त्यस्तै महामन्त्री शर्माले संसद्मा दर्ता भएको विद्यालय शिक्षा विधेयक अस्वीकार्य भएको बताए । ‘पहिलाको प्रस्तावित विधेयक त्रुटिपूर्ण रहेकाले सच्याएर ल्याउने सल्लाह भएको हो, फेरि पनि असङ्गत विधेयक नै ल्याइयो’, उनले भने, ‘म पनि शिक्षकको छोरा हुँ, समस्या बुझेको छु, प्रधानमन्त्रीलाई भन्छु, यो ऐन अस्वीकार्य छ ।’
यस्तै नेपाली कांग्रेसका सहमहामन्त्री बद्री पाण्डेले प्राकृतिकरूपमै पुरानो पुस्ता हट्ने र नयाँ पुस्ता राजनीतिमा उदाउने बताउँदै निराश नहुन युवा पुस्तालाई आग्रह गरे ।
