देशका विभिन्न स्थानबाट मृत अवस्थामा ७ जना फेला परेका छन् । काठमाडौं, चन्द्रागिरी नगरपालिका-३ थानकोट महाशक्ति पेट्रोल पम्प नजिक ग्यारेजमा उदयपुर ताप्ली गाउँपालिका-३ घर भई काठमाडौं चन्द्रागिरी नगरपालिका-२ बस्ने ३२ वर्षीय देविका राई शुक्रबार मृत अवस्थामा फेला परेकी छन् ।

त्यस्तै दार्चुला, दुहुँ गाउँपालिका-४ पोक्से दोरजेर बस्ने ७० वर्षीय धन सिंह लोथ्याल आफ्नै घरबाट करिब २ किलोमिटर टाढा गर्खाबिन्नाको जंगलको ओडारमा शुक्रबार मृत अवस्थामा फेला परेका छन् । यता इलाम, फाकफोकथुम गाउँपालिका-४ बाँदरे खोपस्थित खोल्सामा सोही गाउँपालिका-४ फुँयातप्पा बस्ने ७४ वर्षीय झगरसिंह पिठाकोटे मगर शुक्रबार मृत अवस्थामा फेला परेका छन् ।

यस्तै नुवाकोट, शिवपुरी गाउँपालिका-८ काफलडाँडा बस्ने ८० वर्षीय टिका प्रसाद थपलिया सोही ठाउँ रोमनियाबगरस्थित लिखु खोलामा शुक्रबार मृत अवस्थामा फेला परेका छन् । उता पर्सा, बिन्दबासीनी गाउँपालिका-२ झोगाई खोलाको डिलमा हाल नाम, थर, वतन नखुलेकी अन्दाजी ६५ वर्षीया महिला बिहीबार मृत अवस्थामा फेला परेकी छिन् ।

यसैगरी मोरङ, सुन्दरहरैचा नगरपालिका-१ लक्ष्मीपुर टोल बस्ने ४१ वर्षीय गंगा सुवेदी सोही ठाउँस्थित खेतमा र सोही नगरपालिका-५ बुढिखोलामा सुनसरी धरान उपमहानगरपालिका-६ बस्ने ५५ वर्षीया सार्की माया राई बिहीबार मृत अवस्थामा फेला परेका छन् ।

त्यसैगरी इलाम, इलाम नगरपालिका-११ खुजुम्मे बस्ने ६२ वर्षीय भिम बहादुर जबेगु सोही ठाउँस्थित बारीमा बिहीबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।