नवकान्तिपुर संवाददाता
काठमाडौं, १४ असोज ।
१९औँ एसियाली खेलकुद, २०२२ अन्तर्गत पुरुष क्रिकेट प्रतियोगिता अन्तर्गत दोस्रो खेलमा नेपालले माल्दिभ्सलाई १३८ रनको फराकिलो अन्तरले पराजित गरेको छ ।
झिलाङ्ग युनिभरसिटी अफ टेक्नोलोजीको पिङ्गफेङ्ग क्रिकेट रंगशालामा टस जितेर सुरुआती ब्याटिङ गरेको नेपालले निर्धारित २० ओभरमा सात विकेट गुमाउँदै २१२ रन बनाएको हो ।
नेपालका लागि रोहित कुमारले पौडेल २७ बलमा समान ३ चौका र छक्काको मद्दतमा ५२ रनको अर्धशतकीय पारी खेले भने कुशल मल्ल ४७ रनमा अविजित रहे । त्यस्यै कुशल भुर्तेलर गुलशन झा समान ३५-३५ रन बनाई आउट भए भने विनोद भण्डारीले १३ रन जोडे ।
माल्दिभ्सका लागि स्माइल नवाव बादेयुले ३ तथा मोहम्मद रायन थोलाल, स्माइल अली, मोहम्मद माइभान र नाइल स्माइल नासिरले समान १ विकेट लिए । २१३ रनको लक्ष्य पछ्याउने क्रममा माल्दिभ्स १९.४ ओभरमा मात्र ७४ रनमा अलआउट भयो ।
माल्दिभ्सका लागि मुभियाथ गानीले ३६, रसिद रासमले १२ र फरिद सिउसले १० रन बनाउनु बाहेक माल्दिभ्सका ६ जना खेलाडीले खाता पनि खोल्न सकेनन् । नेपालको लागि अभिनाश बोहराले ६ विकेट लिए भने सोमपाल कामी, गुल्शन झा, सन्दीप लामिछाने र कुशल भुर्तेललेको भागमा समान १-१ विकेट रह्यो ।
जितसंगै नेपाल समूह ए मा शीर्ष स्थानमा रहँदै क्वाटरफाइनलमा प्रवेश गरेको छ । क्वाटरफाइनलमा नेपालले भारत, बंगलादेश, पाकिस्तान, श्रीलंका र अफगानिस्तानमध्ये एउटा टोलीसित खेल्ने छ । पाँचवटै देशले एकदिवसीय विश्वकप प्रतियोगिताका कारण आफ्नो दोस्रो टोली एसियाली खेलकुदमा सहभागिताका लागि पठाएका छन् । प्रतियोगितामा भाग लिन नेपाली पुरुष क्रिकेट टोली आइतबार नै चीन पुगेको हो ।
