देशका विभिन्न स्थानबाट मृत अवस्थामा ४ जना फेला परेका छन् । पर्सा, बहुदरमाई नगरपालिका-६ गम्हरियास्थित नहरको बाटोमा सोही ठाउँ बस्ने ६० वर्षीय रामअंग्या साह कानु मंगलबार मृत अवस्थामा फेला परेका छन् । शव शंकास्पद अवस्थामा देखिएपछि आवश्यक सोधपुछ तथा अनुसन्धानको लागि उनकै २८ वर्षीय छोरालाई प्रहरीले नियन्त्रणमा लिएको छ ।

त्यस्तै सिरहा, सिरहा नगरपालिका-७ शलेश मन्दिरस्थित पोखरीमा सोही ठाउँ बस्ने ४५ वर्षीय लाले पासमान मंगलबार मृत अवस्थामा फेला परेका छन् । यता स्याङ्जा, कालिगण्डकी गाउँपालिका-७ मिर्मी कालिगण्डकी पावर हाउस डयाममा कास्की अन्नपूर्ण गाउँपालिका-३ नौडाँडा बस्ने २६ वर्षीय माधव पौडेल मंगलबार मृत अवस्थामा फेला परेका छन् ।

पर्वत कुश्मा नगरपालिका-८ समादी खोलास्थित भुपिशेरचन राजमार्गमा शनिबार साँझ अविरल वर्षाको कारण बाढी आई बाग्लुङबाट पोखरातर्फ जाँदै गरेको ग.१ ज ६२१३ नम्बरको जीप बगाउँदा वेपत्ता भएका उनको शव फेला परेको हो । यस्तै भक्तपुर, भक्तपुर नगरपालिका-१ सृजनानगरस्थित हनुमन्ते खोलाको किनारमा करिब ३ दिनको जस्तो देखिने सालनाल सहितको नवजात शिशु मंगलबार मृत अवस्थामा फेला परेका छन् । सबै घटनाका सम्बन्धमा प्रहरीले थप अनुसन्धान गरिरहेको छ ।