देशका विभिन्न स्थानबाट मृत अवस्थामा ४ जना फेला परेका छन् । चितवन, इच्छाकामना गाउँपालिका-५ मुग्लिङस्थित गोरखा होटल एण्ड लजमा आइतबारदेखि बस्दै आएका हाल नाम, थर, वतन नखुलेका अन्दाजी ४५ वर्षीय पुरुष मंलगबार मृत अवस्थामा फेला परेका छन् ।

त्यस्तै नुवाकोट, बेलकोटगढी नगरपालिका-२ काफलचौर बस्ने ४२ वर्षीय रोज लामा आफ्नै घरको सुत्ने कोठामा मंगलबार मृत अवस्थामा फेला परेका छन् । यता काठमाडौं महानगरपालिका-११ सुन्धारास्थित श्री गुरु गेष्ट हाउसमा असोज ८ गतेदेखि बस्दै आएकी ललितपुर इमाडोल घर भएकी २० वर्षीया भुमिका राउत बसेकै कोठामा सोमबार मृत अवस्थामा फेला परेकी छिन् ।

यस्तै रूपन्देही, बुटवल उपमहानगरपालिका-१३ नुवाकोट जाने बाटो छेउमा सोही उपमहनगरपालिका-१३ बिजय टोल बस्ने ५७ वर्षीय खिम बहादुर थापा सोमबार मृत अवस्थामा फेला परेका छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।