देशका छुट्टाछुट्टै स्थानमा भएको सवारी दुर्घटनामा नौ जनाको मृत्यु भएको छ । पाल्पाको सदरमुकाम तानसेनदेखि रानीमहल जाने क्रममा रानिमहल सडकखण्डको बैकुण्ठेमा जिप दुर्घटना हुँदा घटनास्थलमै छ जनाको मृत्यु भएको जिल्ला प्रहरी कार्यालय पाल्पाले जनाएको छ ।

आइतबार साँझ करिब ५ बजेको समयमा बागमती प्रदेश ७२०९ नम्बरको जिप दुर्घटना भएको हो । घटनाको विषयमा थप अनुसन्धान भइरहेको प्रहरीले जनाएको छ । मृतकको सनाखत हुन सकेको छैन । जिप खोलामा खसेकाले प्रहरीले उद्धार कार्य गरिरहेको छ ।

त्यस्तै झापा, अर्जुनधारा नगरपालिका-३ खुदुनाबारीस्थित सडकमा लु.१ च ६८६३ नम्बरको गाडी र मे.५ प ४४८५ नम्बरको स्कुटर शनिबार दिउँसो दुर्घटना हुँदा २ जनाको मृत्यु भएको छ । मृत्यु हुनेहरूमा स्कुटर चालक सोही नगरपालिका-२ बस्ने ३५ वर्षीय यम भट्टराई र स्कुटरमा सवार सोही ठाउँ बस्ने ३६ वर्षीय रोसन मगर रहेका छन् ।

दर्घटनामा गम्भीर घाइते भएका उनीहरुको प्रादेशिक अस्पताल भद्रपुर हुँदै बिएण्डसी अस्पताल बिर्तामोडमा थप उपचारको क्रममा मृत्यु भएको हो । गाडी चालकलाई प्रहरीले नियन्त्रणमा लिएको छ । यता भक्तपुर, मध्यपुरठिमी नगरपालिका-७ कमेरेटारस्थित सडकमा बा।२० च ३०३१ नम्बरको हात्ती गाडीको ठक्करबाट भारत मोतिहारी घर भई सोही नगरपालिका-७ कमेरेटार डेरा गरी बस्ने गुड्डुलाल साहकी छोरी ४ वर्षीया आदिती साहको आइतबार बिहान मृत्यु भएको छ ।

आफ्नै डेरा अगाडि खेलिरहेको अवस्थामा उक्त गाडीले ठक्कर दिँदा गम्भीर घाइते भएकी उनको मध्यपुर अस्पताल ठिमीमा उपचारको क्रममा मृत्यु भएको हो । गाडी चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।