देशका विभिन्न स्थानबाट मृत अवस्थामा ९ फेला परेका छन् । काठमाडौं, टोखा नगरपालिका-३ सूर्यदर्शन हाईट बस्ने नुवाकोट बिदुर नगरपालिका- ९ घर भएका ४९ वर्षीय दिपक खड्का आफ्नै घरमा शुक्रबार मृत अवस्थामा फेला परेका छन् ।

यसैगरी काठमाडौं महानगरपालिका-१५ बिजेश्‍वरी डेरा गरी बस्ने दोलखा वैतेश्‍वरी गाउँपालिका-१ घर भएका ३० वर्षीय अरूण लामा आफ्नै कोठामा शनिबार मृत अवस्थामा फेला परेका छन् । यता दार्चुला, महाकाली नगरपालिका-४ खलंगास्थित शिवनगर खेलमैदान नजिक महाकाली कोरिडोर छेउमा सोही नगरपालिका-४ डेरा गरी बस्ने दुहुँ गाउँपालिका-२ हिकिला घर भएका ३५ वर्षीय जय राम टमटा शुक्रबार मृत अवस्थामा फेला परेका छन् ।

यस्तै मुगु, छायाँनाथ रारा नगरपालिका-६ मन्दु बस्ने २८ वर्षीया श्रीदेवी बोहोरा, उनकै छोराहरू ११ वर्षीय मनोज बोहोरा, १ वर्षीय रहर बोहोरा र उनकै छोरी ७ वर्षीया अप्सरा बोहोरा आफ्नै घरमा शुक्रबार बिहान मृत अवस्थामा फेला परेका छन् । घाँटी रेटी हत्या गरेको अवस्थामा उनीहरुको शव फेला परेको भन्ने खबर प्राप्त हुनासाथ जिल्ला प्रहरी कार्यालय मुगु, कर्णाली प्रदेश प्रहरी कार्यालय सुर्खेतबाट कुकुरसहित खटिएको प्रहरी टोलीले घटनाका सम्बन्धमा आवश्यक अनुसन्धान गरिरहेको छ ।

यसैगरी कास्की, माछापुच्छ्रे गाउँपालिका-८ ईदीखोला बस्ने ६२ वर्षीय तुल्सी प्रसाद गौतम घर नजिकै गोरेटो बाटोमा शुक्रबार मृत अवस्थामा फेला परेका छन् । पर्सा, वीरगंज महानगरपालिका-२४ बहुअरी बस्ने २७ वर्षीय प्रदिप यादव आफ्नै घरमा शुक्रबार मृत अवस्थामा फेला परेका छन् । सबै घटनाको सम्बन्धमा प्रहरीले आवश्यक अनुसन्धान गरिरहेको छ ।