देशका छुट्टाछुट्टै स्थानमा भएको सवारी दुर्घटनामा पाँच जनाको मृत्यु भएको छ । काभ्रे, पनौती नगरपालिका-२ सिलाभन्ज्याङस्थित सडकमा बा.४ ख ६७२३ नम्बरको गाडीको ब्रेक फेल भई सडकबाट करिब ६ सय मिटर तल खसेर मंगलबार दिउँसो दुर्घटना हुँदा २ जनाको मृत्यु भएको छ ।

मृत्यु हुनेहरूमा चालक सोही नगरपालिका-कुशादेवी बस्ने ४० वर्षीय रबिन आचार्य र गाडीमा सवार बेथानचोक गाउँपालिका-२ बस्ने ५० वर्षीय शिव बिक्रम केसी रहेका छन् । दुर्घटनामा गम्भीर घाइते भएका उनीहरुको सिर मेमोरियल अस्पतालमा उपचारको क्रममा मृत्यु भएको हो । साथै दुर्घटनामा गम्भीर घाइते भएकी १ जना महिलाको सोही अस्पतालमा उपचार भइरहेको छ ।

त्यस्तै दोलखा, भिमेश्वर नगरपालिका-७ चरङ्गेस्थित सडकमा बा.प्र०२-०४४ प ६८८३ नम्बरको मोटरसाइकल अनियन्त्रित भई मंगलबार दिउँसो दुर्घटना हुँदा चालक गौरिशंकर गाउँपालिका-५ सुरी बस्ने ४० वर्षीय राम कुमार खड्काको मृत्यु भएको छ । दुर्घटनामा गम्भीर घाइते भएका उनको सामुदायिक अस्पताल चरिकोट दोलखामा उपचारको क्रममा मृत्यु भएको हो ।

यस्तै रूपन्देही, गैडहवा गाउँपालिका-२ बिचौवापुरस्थित सडकमा लु.८७ प ४२८५ नम्बरको मोटरसाइकलको ठक्करबाट पैदलयात्री सोही गाउँपालिका-२ पडौरा बस्ने ४२ वर्षीय बिजेन्द्र पासीको सोमबार राति मृत्यु भएको छ । ठक्करबाट गम्भीर घाईते भएका उनको भिम अस्पताल भैरहवामा उपचारको क्रममा मृत्यु भएको हो । हाल फरार मोटरसाइकल चालकको प्रहरीले खोजी गरिरहेको छ ।

यसैगरी कास्की, पोखरा महानगरपालिका-२५ हेम्जास्थित सडकमा ग.२ ख ३७० नम्बरको ट्रकको ठक्करबाट पैदलयात्री म्याग्दी अन्नपूर्ण गाउँपालिका-७ दोसल्ले घर भई हाल पोखरा महानगरपालिका-२५ हेम्जा डेरा गरी बस्ने ७१ वर्षीया याम कुमारी बिकको सोमबार राति मृत्यु भएको छ । ठक्करबाट गम्भीर घाइते भएकी उनको मणिपाल शिक्षण अस्पतालमा उपचारको क्रममा मृत्यु भएको हो । प्रहरीले ट्रकका २ जना सहचालकलाई नियन्त्रणमा लिई हाल फरार चालकको खोजी गरिरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।