देशका विभिन्न स्थानबाट मृत अवस्थामा ६ जना फेला परेका छन् । तनहुँ, शुक्लागण्डकी नगरपालिका-५ बेलचौतारा बस्ने २६ वर्षीय सत्कार पौडेल सोही नगरपालिका-५ ज्ञान बँगैचा टोल बस्ने उनकै साथी गणेश कार्कीको घरमा बुधबार मृत अवस्थामा फेला परेका छन् ।

साथै थप अनुसन्धानको लागि गणेश कार्कीलाई प्रहरीले नियन्त्रणमा लिएको छ । त्यस्तै संखुवासभा, खाँदबारी नगरपालिका-१० बाजोगरा बस्‍ने सम्भु थापाको घरको बरण्डाको बाहिर खाटमा भोजपुर षडानन्द नगरपालिका-१० मालवासे बस्‍ने २९ वर्षीय भक्त नारायण राई बुधबार मृत अवस्थामा फेला परेका छन् ।

यस्तै नवलपरासी पूर्व, बिनयी त्रिबेणी गाउँपालिका-६ स्थित होटल ग्रिलेण्ड रेष्टुरेण्ट एण्ड लजमा कुकको काम गरी बस्ने सिन्धुली कमलामाई नगरपालिका-१४ रानीबास चन्दनपुर घर भएका ५२ वर्षीय पूर्ण बहादुर भुजेल सोही होटलको कोठामा बुधबार मृत अवस्थामा फेला परेका छन् ।

यता बाँके, डुडुवा गाउँपालिका-१ टेपरीस्थित खेतमा गाडिएको अवस्थामा सोही गाउँपालिका-१ बस्ने श्यामलाल हरिजनकी छोरी १२ वर्षीया रिता हरिजनको शव मंगलबार फेला परेको छ । ट्याक्टरले खेत जोत्ने क्रममा शव फेला परेको भन्ने खबर प्राप्त हुनासाथ जिल्ला प्रहरी कार्यालय बाँकेबाट खटिएको प्रहरीले ट्याक्टर चालकलाई आवश्यक सोधपुछको लागि नियन्त्रणमा लिएर थप अनुसन्धान गरिरहेको छ ।

यस्तै अर्घाखाँची, मालारानी गाउँपालिका-९ पात्ले बस्ने ७२ वर्षीया हरिकला भुसाल आफ्नै घरमा मंगलबार मृत अवस्थामा फेला परेकी छन् । उता सिन्धुपाल्चोक, जुगल गाउँपालिका-१ बासखर्कस्थित कुनाघारी कबुलियत जंगलमा हाल नाम, थर, वतन नखुलेका करिब ६२ वर्षीय पुरुष मंगलबार मृत अवस्थामा फेला परेका छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।