नवकान्तिपुर संवाददाता
काठमाडौं, १३ मंसिर ।
तनहुँमा बस दुर्घटना हुँदा ३६ जना घाइते भएका छन् । आज (बुधबार) बिहान पृथ्वीराजमार्गअन्तर्गत तनहुँको व्यास नगरपालिका–१२ घाँसीकुवामा यात्रुवाहक बस दुर्घटना हुँदा ३६ जना घाइते भएका हुन् ।
धरानबाट पोखरातर्फ जाँदै गरेको ग.१ख ७८९५ नम्बरको बस सडकबाट अनियन्त्रित भई तल खसेको जिल्ला प्रहरी कार्यालय तनहुँले जनाएको छ । दुर्घटनामा घाइते भएकाहरुको दमौली अस्पताल र रत्नहरि अस्पतालमा उपचार भइरहेको जिल्ला प्रहरी कार्यालय तनहुँका प्रहरी नायब उपरीक्षक मोहनबहादुर खाँणले जानकारी दिए ।
घाइतेमध्ये केहीलाई पोखरा लैजाने तयारी भइरहेको प्रहरीले जनाएको छ । साथै दुर्घटनाको सम्बन्धमा प्रहरीले अनुसन्धान गरिरहेको छ ।
