देशका विभिन्न स्थानबाट मृत अवस्थामा ६ जना फेला परेका छन् । रसुवा, कालिका गाउँपालिका-२ चिउरीबोट बस्ने ५७ वर्षीय ठाकुर प्रसाद न्यौपाने आफ्नै घरदेखि करिब ४ किलोमिटर टाढा आफ्नै खेतको आलीको डिलमा मंगलबार मृत अवस्थामा फेला परेका छन् ।

त्यस्तै सुनसरी, इटहरी उपमहानगरपालिका-५ डेरा गरी बस्ने खोटाङ घर भएका ७४ वर्षीय अर्जुन राई आफ्नै कोठामा मंगलबार मृत अवस्थामा फेला परेका छन् । यता कैलाली, टिकापुर नगरपालिका-५ झन्झटपुरस्थित रानी कुलोको पानीमा सोही ठाउँ बस्ने ८५ वर्षीया धनसरा देवी शाह सोमबार मृत अवस्थामा फेला परेकी छिन् ।

यस्तै दाङ, गढवा गाउँपालिका-१ रङसिङ खोलाको किनारमा अर्घाखाँची सितगंगा नगरपालिका-८ बस्ने ४९ वर्षीया लक्ष्मी डालामगर सोमबार मृत अवस्थामा फेला परेकी छिन् । उता उदयपुर, कटारी नगरपालिका-५ खैरेनी बस्ने ७८ वर्षीय सरुकलाल कुमार दनुवार घर नजिकै रहेको आफ्नै माछा पोखरीमा सोमबार मृत अवस्थामा फेला परेका छन् ।

यसैगरी सल्यान, कपुरकोट गाउँपालिका-६ डिग्रे बस्ने ५४ वर्षीय रामलाल पुन घरदेखि करिब ६ किलोमिटर टाढा बाटो नजिक सोमबार मृत अवस्थामा फेला परेका छन् । सोही गाउँपालिका-६ जलवाङस्थित आफन्तको घरमा गएका उनी साँझसम्म घर नफर्किएपछि खोजी गर्ने क्रममा उनको शव फेला परेको हो । सबै घटनाका सम्बन्धमा प्रहरीले थप अनुसन्धान गरिरहेको छ ।