देशका विभिन्न स्थानबाट मृत अवस्थामा ५ जना फेला परेका छन् । बाँके, नेपालगंज उपमहानगरपालिका-१ पुष्पलाल चोकस्थित पानीको तलाउमा सल्यान कुपिण्डे नगरपालिका-३ बाचकोट बस्ने ६२ वर्षीय तेज बहादुर बिक बिहीबार मृत अवस्थामा फेला परेका छन् ।

त्यस्तै सिन्धुपाल्चोक, बलेफी गाउँपालिका-४ जंघारेस्थित भिरमा हाल नाम, थर, वतन नखुलेका करिब ४० वर्षीय पुरुष बिहीबार मृत अवस्थामा फेला परेका छन् । यता काठमाडौं, गोकर्णेश्‍वर नगरपालिका-७ दक्षिणढोका डेरा गरी बस्ने रामेछाप मन्थली नगरपालिका-१० घर भएका ४२ वर्षीय मनिष समाल मगर आफ्नै कोठा नजिकै रहेको भर्‍याङमा बिहीबार मृत अवस्थामा फेला परेका छन् ।

यसैगरी काठमाडौं तार्केश्वर नगरपालिका-१ साङ्ला भत्केकोपुल नजिक खुल्ला चौरमा नवजात शिशुको शव सडेगलेको अवस्थामा बुधबार फेला परेको छ । उता मोरङ, सुनबर्सी नगरपालिका-६ झपडतल बस्ने ५५ वर्षीय बल बहादुर कार्की सोही ठाउँस्थित छिमेकीको घरमा बुधबार मृत अवस्थामा फेला परेका छन् । सवै घटनाका सम्बन्धमा प्रहरीले आवश्यक अनुसन्धान गरिरहेको छ ।