देशका विभिन्न स्थानबाट मृत अवस्थामा १० जना फेला परेका छन् । सिन्धुपाल्चोक, त्रिपुरासुन्दरी गाउँपालिका-६ ड्यामसाईडस्थित सुनकोशी हाईड्रोपावरको ड्यामको पानीमा बलेफी गाउँपालिका-८ कागुने बस्ने ३० वर्षीय बिशाल लामा बुधबार मृत अवस्थामा फेला परेका छन् ।
उनी गत मंसिर २८ गतेदेखि हराएको बुझिएको छ । त्यस्तै काठमाडौं, काठमाडौं महानगरपालिका-२५ भेडासिंह डेरा गरी बस्ने भारत पश्चिम बंगाल घर भएका ५१ वर्षीय बब्लु हल्देर आफ्नै कोठामा बुधबार मृत अवस्थामा फेला परेका छन् ।
यसैगरी काठमाडौं महानगरपालिका-३ बाँसबारीस्थित विलिङ्नेस अस्पतालको भान्सामा कार्यरत सिन्धुपाल्चोक घर भएकी ६० वर्षीया अम्बिका तिमिल्सेना सोही अस्पतालको अण्डर ग्राउण्डमा रहेको पानी ट्याङकीभित्र बुधबार मृत अवस्थामा फेला परेकी छन् ।
यता डडेल्धुरा, अमरगढी नगरपालिका-९ हतर्क बस्ने २६ वर्षीय सन्तोष भट्ट सोही ठाउँस्थित छाउडी खोलामा बुधबार मृत अवस्थामा फेला परेका छन् । यस्तै सप्तरी, रुपनी गाउँपालिका-४ छप्की बस्ने ५० वर्षीय जगरनाथी साह आफ्नै खेतमा मंगलबार मृत अवस्थामा फेला परेका छन् । आइतबारदेखि घरबाट हिँडी बेपत्ता भएका उनको खोजी गर्ने क्रममा शव फेला परेको हो ।
उता खोटाङ, दिक्तेल रुपाकोट मझुवागढी नगरपालिका-१० पाथेकास्थित आफ्नै माइती घर बस्ने ३६ वर्षीया पवित्रा तामाङ सोही ठाउँस्थित आफ्नै बर्खे गोठभित्र मंगलबार मृत अवस्थामा फेला परेकी छिन् । गत मंसिर २० गते घरबाट हिँडी बेपत्ता भएकी उनको पत्करले छोपिएको अवस्थामा शव फेला परेको हो ।
यस्तै कैलाली, घोडाघोडी नगरपालिका-१ लोरपुरस्थित शिव शक्ति सामुदायिक वनमा सोही नगरपालिका-१ लक्ष्मीपुर बस्ने ७३ वर्षीय गंगाधर गौतम मंगलबार मृत अवस्थामा फेला परेका छन् । त्यस्तै गोरखा, गोरखा नगरपालिका-३ रोजिटार बस्ने ५७ वर्षीया तिल कुमारी ईस्माली मगर आफ्नै घरको आँगनमा मंगलबार मृत अवस्थामा फेला परेकी छन् ।
यसैगरी उदयपुर, कटारी नगरपालिका-१० बरडाँडा बस्ने ४१ वर्षीय कमल कार्की सोही ठाउँस्थित छिमेकीको घरमा सुतेकोमा मंगलबार मृत अवस्थामा फेला परेका छन् । त्यसैगरी बाँके, नेपालगंज उपमहानगरपालिका-९ बाँके गाउँ घर भएका ५१ वर्षीय अशोक कुमार कुहार सोही उपमहानगरपालिका-१३ स्थित साथीको कोठामा मंगलबार मृत अवस्थामा फेला परेका छ्न् । यस सम्बन्धमा प्रहरीले आवश्यक अनुसन्धान गरिरहेको छ ।
