देशका विभिन्न स्थानबाट मृत अवस्थामा ७ जना फेला परेका छन् । ललितपुर, ललितपुर महानगरपालिका-१६ मंगलबजार नकबहिलस्थित ग्रिन तारा हेरिटेज होम होटल एण्ड लजमा विगत एक वर्षदेखि बस्दै आएकी जर्मन नागरिक ६० वर्षीया एडेलचेइड इसच्नेसबर्गर (Adelcheid Schneskenburger) सोमबार मृत अवस्थामा फेला फेला परेकी छन् ।

त्यस्तै ललितपुर, गोदावरी नगरपालिका-२ गोदावरी कान्लेचौर घर भई सोही ठाउँस्थित ससुराली घरमा बस्दै आएका ६२ वर्षीय कमल तामाङ रुम्बा शौचालयमा गएराति मृत अवस्थामा फेला परेका छन् । यसैगरी सोही नगरपालिका-१८ चोभार भन्ज्याङमा हाल पहिचान खुल्न नसकेको बालिका नवजात शिशुको शव सोमबार फेला परेको छ ।

यस्तै दार्चुला, नौगाड गाउँपालिका-४ गोठ्यौडी खोलामा सोही गाउँपालिका-५ परगैरा बस्ने ३२ वर्षीया छुचा धामी सोमबार मृत अवस्थामा फेला परेकी छन् । उता ताप्लेजुङ, आठराई त्रिवेणी गाउँपालिका-२ मातेस्थित तमोर नदीमा पाँचथर याङबरक गाउँपालिका-६ नागी बस्ने २६ वर्षीया यमुना चापागाई सोमबार मृत अवस्थामा फेला परेकी छन् ।

आइतबार दिउँसो यमुनाले उनको २५ दिनको छोरा होम नाथ चापागाईंलाई खोप लगाउन जान्छु भनी घरबाट हिँडेकी उनी बेलुका अबेरसम्म घर नआएको भन्ने खबर प्राप्त हुनासाथ अस्थायी प्रहरी चौकी फुलबारीबाट खटिएको प्रहरीले खोजी गर्ने क्रममा उनको शव फेला पारेको हो । साथै होम नाथ चापागाईंको प्रहरीले खोजी गरिरहेको छ ।

यता काठमाडौं, नागर्जुन नगरपालिका-४ मिलनटोल डेरा गरी बस्ने बागलुङ गल्कोट नगरपालिका-११ घर भएका २५ वर्षीय दिनेश दर्जी आफ्नै कोठामा आइतबार मृत अवस्थामा फेला परेका छन् । त्यस्तै नवलपरासी पश्चिम, रामग्राम नगरपालिका-१४ पर्सावाल बस्ने ४१ वर्षीय प्रदिप चौधरी आफ्नै घरको बरन्डामा आइतबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।