पर्सा र झापाबाट स्रोत नखुलेको रकमसहित दुई जना पक्राउ परेका छन् । पर्सा, वीरगंज महानगरपालिका-१५ भेडियाहीबाट स्रोत नखुलेको नगद ४ लाख ५० हजार रूपैयाँसहित बारा फेटा गाउँपालिका-३ बैरिया बस्ने ३८ वर्षीय बिरेन्द्र प्रसाद गुप्तालाई सोमबार दिउँसो प्रहरीले पक्राउ गरेको छ ।

जिल्ला प्रहरी कार्यालय पर्साबाट खटिएको प्रहरीले प्रदेश २-०३ प ५६६४ नम्बरको मोटरसाइकललाई जाँच गर्ने क्रममा गुप्ताले जिन्स पाईन्टको खल्ती र जुत्ताभित्र लुकाई राखेको उक्त नगद फेला पारी पक्राउ गरेको हो ।

त्यस्तै झापा, भद्रपुर नगरपालिका-८ भद्रपुर विमानस्थलबाट स्रोत नखुलेको ३० हजार भारतीय रूपैयाँ, ९ हजार २ सय अमेरिकी डलर, अन्य विभिन्न देशका नोटहरु तथा विभिन्न बैंकका एटिएम कार्डसहित भारत आन्द्रप्रदेश बस्ने ४२ वर्षीय पोलागानी तिरूमाला रावलाई मंगलबार बिहान प्रहरीले पक्राउ गरेको छ ।

बुद्ध एयरको उडानद्वारा भद्रपुरदेखि काठमाडौं जान लागेका रावको लगेज जाँच गर्ने क्रममा उक्त परिमाणको नगद फेला पारी पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।