देशका विभिन्न स्थानबाट मृत अवस्थामा छ जना फेला परेका छन् । काठमाडौं महानगरपालिका-९ बिजयचोकस्थित सिरहा-धनुषा गेष्ट हाउसमा हाल नाम, थर, वतन नखुलेकी ४० वर्षीया महिला शनिबार मृत अवस्थामा फेला परेकी छिन् ।

सिन्धुली घर र सन्दिप लामा नाम टिपाएका पुरूष र ती महिला शुक्रबारदेखि उक्त होटलमा बसेको कोठामा महिलाको शव फेला परेको भन्ने खबर प्राप्त हुनासाथ प्रहरी वृत्त गौशालाबाट खटिएको प्रहरीले हाल फरार पुरूषको खोजी गर्नुका साथै आवश्यक अनुसन्धान गरिरहेको छ ।

यसैगरी काठमाडौं, टोखा नगरपालिका-६ धापासीस्थित टहरामा डेरा गरी बस्ने ओखलढुङगा लिखु गाउँपालिका-३ घर भएका २३ वर्षीय दिपेश खड्का सोही टहरामा गएराति मृत अवस्थामा फेला परेका छन् । त्यस्तै भक्तपुर, सूर्यबिनायक नगरपालिका-४ शान्भी गर्ल्स होस्टेलमा बस्ने जाजरकोट नलगाड नगरपालिका-४ घर भएकी २८ वर्षीया कौसिला गौतम आफ्नै कोठामा शनिबार मृत अवस्थामा फेला परेकी छिन् ।

यस्तै गुल्मी, रूरूक्षेत्र गाउँपालिका-२ ईजरे डाँडा बस्ने ६२ वर्षीय हिम बहादुर कामी सोही गाउँपालिका-२ घड्लङ डाँडामा शनिबार मृत अवस्थामा फेला परेका छन् । बिहीबार दिउँसो घरबाट हिँडि बेपत्ता भएका उनको खोजी गर्ने क्रममा शव फेला परेको हो ।

यता धादिङ, गजुरी गाउँपालिका-४ गैरी गाउँ बस्ने ७६ वर्षीय श्रीकृष्ण तामाङ सोही ठाउँस्थित अजेरी भन्ने जंगलमा शनिबार मृत अवस्थामा फेला परेका छन् । यस्तै ललितपुर, महालक्ष्मी नगरपालिका-१ ईमाडोलस्थित गल्लीमा सोही ठाउँ बस्ने सिन्धुली सुनकोशी गाउँपालिका घर भएका ६० वर्षीय नाबुराम तुलामी शनिबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।