देशका छुट्टाछुट्टै स्थानमा भएको सवारी दुर्घटनामा छ जनाको मृत्यु भएको छ । तनहुँ, शुक्लागण्डकी नगरपालिका-११ कालिकोटस्थित सडकमा गाछेपानीबाट चिसापानीतर्फ जाँदै गरेको ग.१ त २५३२ नम्बरको ट्याक्टर शुक्रबार बिहान दुर्घटना हुँदा ट्याक्टरमा सवार सोही नगरपालिका-२ गाछेपानी बस्ने २४ वर्षीय सोम बहादुर परियारको घटनास्थलमै मृत्यु भएको छ ।

हाल फरार ट्याक्टर चालकको प्रहरीले खोजी गरिरहेको छ । त्यस्तै रामेछाप, मन्थली नगरपालिका-६ सेलेघाट सिल्लिबजारस्थित सडकमा बा.२ क ४५०७ नम्बरको टिपर अनियन्त्रित भई सडकबाट करिब १ सय ५० मिटर तल खसेर शुक्रबार बिहान दुर्घटना हुँदा चालक महोत्तरी बर्दिबास नगरपालिका-४ गौरीडाँडा घर भएका ५० वर्षीय जय बहादुर माझीको घटनास्थलमै मृत्यु भएको छ ।

यसैगरी तनहुँ, शुक्लागण्डकी नगरपालिका-१० छाब्दी देउरालीस्थित सडकमा ग.७ प ६९२४ नम्बरको मोटरसाइकल र ग.१ त ३९९४ नम्बरको ट्याक्टर एकआपसमा ठक्कर खाई बिहीबार दिउँसो दुर्घटना हुँदा मोटरसाइकमा सवार सोही नगरपालिका-१ थप्रेक बस्ने ४५ वर्षीया पिपलकौरी गुरूङको घटनास्थलमै मृत्यु भएको छ ।

ट्याक्टर र मोटरसाइकल चालकलाई प्रहरीले नियन्त्रणमा लिएको छ । यस्तै सल्यान, कालिमाटी गाउँपालिका-४ हुल्केखोलामा घोरचौरबाट कालिमाटीतर्फ जाँदै गरेको रा.१ त ४४५८ नम्बरको ट्याक्टर अनियन्त्रित भई बिहीबार राति दुर्घटना हुँदा चालक त्रिबेणी गाउँपालिका-१ बस्ने २७ वर्षीय शसिराम घर्तीको घटनास्थलमै मृत्यु भएको छ ।

यता बझाङ, जयपृथ्बी नगरपालिका-११ साईलाबगरस्थित सडकमा से.१ ज ८६८ नम्बरको जीप सडकबाट करिब १ सय ५० मिटर तल खसेर बिहीबार राति दुर्घटना हुँदा जीपमा सवार सोही गाउँपालिका-१ बस्ने १९ वर्षीय सुस्मिता कठायतको मृत्यु भएको छ ।

दुर्घटनामा गम्भीर घाइते भएकी उनको जिल्ला अस्पताल बझाङमा उपचरको क्रममा मृत्यु भएको हो । साथै दुर्घटनामा घाइते भएका चालक र सहचालकको सोही अस्पताल हुँदै थप उपचारको लागि धनगढी रिफर गरिएको छ । उता सिन्धुली, दुधौली नगरपालिका-९ आँप डाँडास्थित सडकमा स.१० प ३९०९ नम्बरको मोटरसाइकललाई प्र.१-०५-००१ प ६२८६ नम्बरको मोटरसाइकलले शुक्रबार बिहान ठक्कर दिई दुर्घटना हुँदा प्र.१-०५-००१ प ६२८६ नम्बरको मोटरसाइकल चालक सोही नगरपालिका-१० बस्ने २३ वर्षीय बेचु कुमरको मृत्यु भएको छ ।

दुर्घटनामा गम्भीर घाइते भएका उनको कटारी सरकारी हस्पिटलमा उपचारको क्रममा मृत्यु भएको हो । साथै दुर्घटनामा घाइते भएका स.१० प ३९०९ नम्बरको मोटरसाइकल चालकको प्रयाग हस्पिटल दुधौलीमा उपचार भइरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।