देशका विभिन्न स्थानबाट मृत अवस्थामा छ जना फेला परेका छन् । काठमाडौं महानगरपालिका-२६ गोंगबुस्थित न्यू पुर्वाञ्चल नोबेल गेष्ट हाउसमा काम गर्दै आएकी मोरङ उर्लावारी घर भएकी ५५ वर्षीया गोमा देवी तामाङ सोही गेष्ट हाउसको चौथो तलामा रहेको स्टोर कोठाभित्र सोमबार मृत अवस्थामा फेला परेकी छिन् ।

त्यस्तै बझाङ, खप्तड छान्ना गाउँपालिका-७ गडरायस्थित सडकको नालीमा सोही गाउँपालिका-६ बस्ने ५५ वर्षीय काले थापा सोमबार मृत अवस्थामा फेला परेका छन् । यता काठमाडौं, बुढानिलकण्ठ नगरपालिका-१३ चुनिखेलस्थित टहराको पेटीमा मोरङ पथरीशनिश्चरे-१० घर भएका ४७ वर्षीय देवराज गौतम आइतबार मृत अवस्थामा फेला परेका छन् ।

यस्तै नुवाकोट, बिदुर नगरपालिका-७ तुप्चे बस्ने ४८ वर्षीय थंक बहादुर सुबेदी किस्पाङ गाउँपालिका-५ जयडाँडास्थित सोले काउले लामीडाँडा भिरमा आइतबार मृत अवस्थामा फेला परेका छन् । उता झापा, अर्जुनधारा नगरपालिका-५ बस्ने ४१ वर्षीय लब लाल राजबंशी बिर्तामोड नगरपालिका-२ साङ्गबेद टोलस्थित आफ्नै काका मलिक लाल राजबंशीको घरमा आइतबार मृत अवस्थामा फेला परेका छन् ।

यसैगरी कालिकोट, शुभकालिका गाउँपालिका-२ भर्तागार्ड खोलाको भुनछहरा दहमा सोही गाउँपालिका-३ पर्जै बस्ने ३७ वर्षीय प्रेम मगर आइतबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।