देशका विभिन्न स्थानबाट मृत अवस्थामा पाँच जना फेला परेका छन् । खोटाङ, रावाबेसी गाउँपालिका-२ डाँडाटोल बस्ने २२ वर्षीया निर्मला नेपाली आफ्नै घरमा मंगलबार मृत अवस्थामा फेला परेकी छिन् ।

त्यस्तै बझाङ, मष्टा गाउँपालिका-४ स्थित तोला ढुङ्गा जंगलमा जयपृथ्वी नगरपालिका-९ देवल बस्ने २५ वर्षीय धन बहादुर धामी मंगलबार मृत अवस्थामा फेला परेका छन् । यस्तै रूपन्देही, मर्चवारी गाउँपालिका-६ वैरिहवास्थित डण्डा नदीमा भारत लक्ष्मीपुर बस्ने ३० वर्षीय राम सुरत कुर्मी मंगलबार मृत अवस्थामा फेला परेका छन् ।

नदीमा डुबेर बेपत्ता भएको भन्ने खबर प्राप्त हुनासाथ प्रहरी चौकी ठर्कीबाट खटिएको प्रहरीले खोजी गर्ने क्रममा शव फेला पारेको हो । उता चितवन, भरतपुर महानगरपालिका-१७ गोब्रेनी बस्ने ५३ वर्षीय ओम बहादुर सार्की आफ्नै घरमा सोमबार मृत अवस्थामा फेला परेका छन् ।

त्यसैगरी नवलपरासी पश्चिम, सुस्ता गाउँपालिका-२ गुदरीयास्थित सार्वजनिक चौतरीमा हाल नाम, थर, वतन नखुलेका अन्दाजी ४० वर्षीय पुरूष सोमबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको छ ।