देशका छुट्टाछुट्टै स्थानमा भएको सवारी दुर्घटनामा चार जनाको मृत्यु भएको छ । काठमाडौं महानगरपालिका-२८ पुतली सडकमा बा.२१ च ६४४८ नम्बरको पिकअप गाडी र बा.प्र०२-०२७ प ८२८० नम्बरको मोटरसाइकल एक आपसमा ठक्कर खाई गएराति दुर्घटना हुँदा मोटरसाइकल चालक काठमाडौं महानगरपालिका-१२ बस्ने २३ वर्षीय शाहिल देउलाको मृत्यु भएको छ ।

दुर्घटनामा गम्भीर घाइते भएका उनको ट्रमा सेन्टरमा उपचारको क्रममा मृत्यु भएको हो । गाडी चालकलाई प्रहरीले नियन्त्रणमा लिएको छ ।
धनुषा, मिथिला नगरपालिका-२ नक्टाझिजस्थित सडकमा बिग्रेर रोकी राखेको प्र.२-०१-००१ क ०१६० नम्बरको टिपरमा म.प्र.०१-००४ प ७५०० नम्बरको मोटरसाइकल ठक्कर खाई गएराति दुर्घटना हुँदा मोटरसाइकल चालक हाल नाम, थर, वतन नखुलेका अन्दाजी ३० वर्षीय पुरूषको घटनास्थलमै मृत्यु भएको छ ।

त्यस्तै नवलपरासी पश्‍चिम, प्रतापपुर गाउँपालिका-५ धर्मौलीस्थित डायमण्ड इंगलिस बोर्डिङ स्कुलको लु.१ क १०८१ नम्बर बसबाट लडेर सोही स्कुलको युकेजीमा अध्यनरत ७ वर्षीय अमन धोबीको मंगलबार दिउँसो मृत्यु भएको छ । बसबाट झर्ने क्रममा लडेर गम्भीर घाइते भएका उनको सहिद स्मृती सामुदायिक अस्पताल चौपत्तामा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।कैलाली, गोदावरी नगरपालिका-४ बनदेबी मन्दिर नजिक युके ०५ बि १७१० नम्बरको कार मंगलबार राति दुर्घटना हुँदा कार चालक गोदावरी नगरपालिका-३ मालिका टोल बस्ने ४५ वर्षीय दिपक सिजापतीको मृत्यु भएको छ ।

दुर्घटनामा गम्भीर घाइते भएका उनको माया मेट्रो अस्पताल धनगढीमा उपचारको क्रममा मृत्यु भएको हो । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।