देशका विभिन्न स्थानबाट मृत अवस्थामा सात जना फेला परेका छन् । रौतहट, चन्द्रपुर नगरपालिका-१ माथिल्लो क्यान्टिन बजार बस्ने ३० वर्षीयको कृष्ण बाबु लामा छिमेकीको घरको छतमा शुक्रबार मृत अवस्थामा फेला परेका छन् ।

त्यस्तै कपिलवस्तु, शिवराज नगरपालिका-४ चनई घर भई सोही नगरपालिका-४ डकैयास्थित घरमा काम गरी बस्ने ६५ वर्षीय तुल्सिराम यादव सोही घर नजिक रहेको परालको चाङमा शुक्रबार मृत अवस्थामा फेला परेका छन् । यस्तै बझाङ, केदारस्युँ गाउँपालिका-८ बस्ने ३१ वर्षीय मदन धामी सोही ठाउँस्थित चडेपानी भिरमुनि शुक्रबार मृत अवस्थामा फेला परेका छन् । बिहीबार घरबाट निस्केकोमा घर नआएपछि खोजी गर्ने क्रममा शव फेला परेको हो ।

उता गुल्मी, मालिका गाउँपालिका-१ रातामाटा बस्ने ४७ वर्षीय लाल बहादुर विक घर नजिक रहेको शौचालय नजिक शुक्रबार मृत अवस्थामा फैला परेका छन् । बिहीबार स्वास्थ्य चौकी जान्छु भनी हिँडेका उनी नफर्किएपछि खोजी गर्ने क्रममा शव फेला परेको हो ।

यता मनाङ, नासो गाउँपालिका-७ सामुदायिक चौरी गोठमा चौरी हेरचाह गरी बस्ने हाल नाम, थर, वतन नखुलेका अन्दाजी ६५ वर्षीय पुरूष बिहीबार मृत अवस्थामा फेला परेका छन् । यसैगरी गोरखा, आरूघाट गाउँपालिका-३ स्वारा गाँउ बस्ने ४२ वर्षीय अमर बहादुर आले सोही ठाउँ कुईरे फाँटस्थित बुढीगण्डकी नदीको किनारमा बिहीबार मृत अवस्थामा फेला परेका छन् ।

यस्तै कपिलवस्तु, बुद्धभुमी नगरपालिका-२ गोरुसिंगेस्थित तिलौराकोट साझेदारी वन नजिक सडकको कलभर्ट मुनी हाल नाम, थर, वतन नखुलेकी अन्दाजी ४५ वर्षीया महिला बिहीबार मृत अवस्थामा फेला परेकी छिन् । यस सम्बन्धमा प्रहरीले आवश्यक अनुसन्धान गरिरहेको छ ।