देशका विभिन्न स्थानमा भएको सवारी दुर्घटनामा पाँच जनाको मृत्यु भएको छ । पाँचथर, हिलिहाङ गाउँपालिका-७ हेवाखोलास्थित सडकमा ताप्लेजुङबाट झापातर्फ आउँदै गरेको बा.१७ च ७९९९ नम्बरको गाडीको अनियन्त्रित भई शुक्रबार दिउँसो दुर्घटना हुँदा चालक बाँके नेपालगंज घर भएका ३५ वर्षीय श्याम बिकको मृत्यु भएको छ ।

दुर्घटनामा गम्भीर घाइते भएका उनको जिल्ला अस्पताल पाँचथरमा उपचारको क्रममा मृत्यु भएको हो । साथै दुर्घटनामा घाइते भएका गाडीमा सवार एक जनालाई थप उपचारको लागि झापातर्फ रिफर गरिएको छ । त्यस्तै  मकवानपुर, हेटौंडा उपमहानगरपालिका-११ थानाभर्याङस्थित सडकमा हेटौंडाबाट चितवनतर्फ आउँदै गरेको ना.७ ख १६७५ नम्बरको बसको ठक्करबाट पैदलयात्री हाल नाम, थर, वतन नखुलेका अन्दाजी ४० वर्षीय पुरूषको शुक्रबार राति घटनास्थलमै मृत्यु भएको छ । बस चालकलाई प्रहरीले नियन्त्रणमा लिएको छ ।

यस्तै रूपन्देही, बुटवल उपमहानगरपालिका-२ जितगढीस्थित सडकमा प्र.३-०२-००२ प २०३६ नम्बरको मोटरसाइकल आफै अनियन्त्रित भई शुक्रबार राति दुर्घटना हुँदा मोटरसाइकलमा सवार सोही उपमहानगरपालिका-४ बस्ने ४२ वर्षीय गोविन्द अर्यालको मृत्यु भएको छ । दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो ।

यसैगरी रूपन्देही, तिलोत्तमा नगरपालिका-४ जन सेवा चोकमा भैरहवादेखि बुटवलतर्फ जाँदै गरेको लु.३१ प १६४२ नम्बरको मोटरसाइकल आफै अनियन्त्रित भई शुक्रबार राति दुर्घटना हुँदा चालक सोही नगरपालिका-६ बस्ने २४ वर्षीय बिबेक डुम्रेको मृत्यु भएको छ । दुर्घटनामा गम्भीर घाइते भएका उनको लुम्बिनी प्रादेशिक अस्पतालमा उपचारको क्रममा मृत्यु भएको हो ।

साथै दुर्घटनामा घाइते भएका मोटरसाइकलमा सवार एक जनाको सोही अस्पतालमा उपचार भइरहेको छ ।यता कपिलवस्तु, कपिलवस्तु नगरपालिका-३ मैतास्थित सडकमा लु.४४ प १३१४ नम्बरको मोटरसाइकल आफै अनियन्त्रित भई शनिबार बिहान दुर्घटना हुँदा मोटरसाइकलमा सवार रूपन्देही सैनामैना नगरपालिका-५ गडवा बस्ने २३ वर्षीय कुमार थारूको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल तौलिहवामा उपचारको क्रममा मृत्यु भएको हो ।

साथै दुर्घटनामा घाइते भएका मोटरसाइकल चालकको थप उपचारको लागि मेडिकल कलेज भैरहवातर्फ पठाइएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।