अमेरिकाका पूर्व राष्ट्रपति डोनाल्ड ट्रम्पमाथि गोली प्रहार भएको छ । अमेरिकाको पेन्सीलभानियाको बटलरमा भएको चुनावी र्‍यालीमा ट्रम्पमाथि गोली प्रहार भएको हो ।

पूर्व राष्ट्रपति ट्रम्प मञ्चमा बोल्दै गर्दा उहाँमाथि करिब ३०० यार्ड परबाट राइफलबाट गोली हानिएको ठुलो आवाज सुनिएको र लगातार गोली चलेको प्रत्यक्षदर्शीले बताएका छन् । ट्रम्पमाथि गोली चलाउने व्यक्तिलाई सुरक्षाकर्मीले गोली हानेर मारेका छन् भने सो घटनामा अर्का एक सर्वसाधारण व्यक्तिको पनि मृत्यु भएको छ ।

उहाँको कान र अनुहारमा रगत देखिएको छ भने उहाँलाई सुरक्षा टोलीले त्यहाँबाट अस्पताल पुर्‍याएका थिए । यता अमेरिकी राष्ट्रपति जो बाइडेनले ट्रम्पमाथि भएको आक्रमणको निन्दा गर्नुभएको छ । त्यस्तै अमेरिकी सिक्रेट सर्भिसका प्रवक्ता एन्थोनी गुग्लेल्मीले घटनाबारे जानकारी दिँदै ट्रम्प पूर्णरुपमा सुरक्षित रहेको र उहाँमाथि आक्रमण गर्ने संदिग्ध बन्दुकधारी सुरक्षा कारबाहीमा मारिएको जनाएको छ ।घटनाका विषयमा थप अनुसन्धान भइरहेको छ ।