देशका विभिन्न स्थानबाट मृत अवस्थामा आठ जना फेला परेका छन् । झापा, अर्जुनधारा नगरपालिका-१ सिस्नेस्थित धान खेतमा सोही नगरपालिका-१ स्थित भिनाजुको घरमा बस्ने इलाम माई नगरपालिका-३ घर भएका ४५ वर्षीय टिका बहादुर लावती बुधबार मृत अवस्थामा फेला परेका छन् ।

त्यस्तै बर्दिया, गुलरिया नगरपालिका-१ गाउँ नम्बर १४ बस्ने ३१ वर्षीया रन्जिता थारू आफ्नै घरमा बुधबार मृत अवस्थामा फेला परेकी छिन् । यस्तै सुर्खेत, बिरेन्द्रनगर नगरपालिका-१५ बुबैराखे बस्ने ३६ वर्षीय नरसिंह बिसी आफ्नै घरमा बुधबार मृत अवस्थामा फेला परेका छन् ।

उता मकवानपुर, बागमती गाउँपालिका-५ बगेरीस्थित बागमती खोलामा हाल नाम, थर, वतन नखुलेका अन्दाजी २५ वर्षीय पुरूष बुधबार मृत अवस्थामा फेला परेका छन् । यता कास्की, पोखरा महानगरपालिका-१३ दुई कुलाको मुहानस्थित ड्याममा हाल नाम, थर, वतन नखुलेकी अन्दाजी ३५ वर्षीया महिला मंगलबार मृत अवस्थामा फेला परेकी छिन् ।

त्यसैगरी चितवन, भरतपुर महानगरपालिका-६ देवनगरस्थित खगेरी सिंचाइ नहरमा रत्ननगर नगरपालिका-९ खगेरी सिंचाइको पोखरी फर्ममा काम गरी बस्ने नुवाकोट बेल‌कोटगढी नगरपालिका-९ जिलीङ घर भएकी ३३ वर्षीया ब‌विता भट्ट मंगलबार मृत अवस्थामा फेला परेकी छिन् ।

यसैगरी चितवन, भरतपुर महानगरपालिका-१६ भगेरी थानस्थित नारायणी नदीको किनारमा हाल नाम, थर, वतन नखुलेका अन्दाजी ३० वर्षीय पुरूष बुधबार मृत अवस्थामा फेला परेका छन् । यस्तै सुनसरी, कोशी गाउँपालिका-४ जुद्दगंजस्थित सडक छेउमा हाल नाम, थर, वतन नखुलेका अन्दाजी ५० वर्षीय पुरूष मंगलबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।