देशका विभिन्न स्थानबाट मृत अवस्थामा १० जना फेला परेका छन् । तनहुँ, म्याग्दे गाउँपालिका-५ छाङपाटन बस्ने ४० वर्षीया सोनु कुमाल सोही ठाउँस्थित मकै बारीमा आइतबार मृत अवस्थामा फेला परेकी छिन् ।

शनिबार बिहान मेला जान्छु भनेर निस्किएकी उनी फर्की नआएपछि खोजी गर्ने क्रममा शव फेला परेको हो । त्यस्तै रूपन्देही, मायादेबी गाउँपालिका-६ पिप्रहवा बस्ने ५७ वर्षीय श्रीराम तेली सोही ठाउँस्थित उँखु बारीमा आइतबार मृत अवस्थामा फेला परेका छन् । शनिबार घरबाट हिँडेका उनी घर नआई सम्पर्क बिहिन भएको भन्ने खबर प्राप्त हुनासाथ प्रहरी चौकी हाटिबनगाईबाट खटिएको प्रहरीले स्थानीयको सहयोगमा खोजी गर्ने क्रममा शव फेला परेको हो ।

यसैगरी रूपन्देही, बुटवल उपमहानगरपालिका-६ स्थित लुम्बिनी प्रादेशिक अस्पतालको आईसियु वार्डको कुरूवाले प्रयोग गर्ने शौचालयमा कास्की घर भई बुटवल उपमहानगरपालिका- ७ जीतनगर बस्ने ५५ वर्षीय पूर्ण बहादुर पुन आइतबार मृत अवस्थामा फेला परेका छन् । यस्तै कास्की, रूपा गाउँपालिका-६ टिकाकुना बस्ने ७१ वर्षीया राधादेवी घिमिरे सोही ठाउँस्थित खेतमा आइतबार मृत अवस्थामा फेला परेकी छिन् ।

उता मोरङ, बुढीगंगा गाउँपालिका-६ कोयलपुरस्थित माछा फर्मको पोखरीमा डुबेर मृत्यु भएको अवस्थामा सोही फर्ममा काम गर्ने बुढीगंगा गाउँपालिका-२ टंकी बस्ने ४० वर्षीय अर्जुन श्रेष्ठ आइतबार फेला परेका छन् । यता बाँके, नेपालगंज उपमहानगरपालिका-१८ बनिया गाउँ नजिकै खेतमा हाल नाम, थर, वतन नखुलेका अन्दाजी २६ वर्षीय पुरुष आइतबार मृत अवस्थामा फेला परेका छन् ।

यस्तै गोरखा, गण्डकी गाउँपालिका- ८ बर्खेघाटस्थित त्रिशुली नदी किनारामा हाल नाम, थर, वतन नखुलेकी महिला आइतबार मृत अवस्थामा फेला परेकी छिन् । त्यस्तै नवलपरासी पूर्व, गैंडाकोट नगरपालिका-२ डेरा गरी बस्ने कैलाली धनगढी उपमहानगरपालिका-१ घर भएका ४६ वर्षीय सन्जिव शाही आफ्नै डेरा कोठामा शनिबार मृत अवस्थामा फेला परेका छन् ।

उता सिराहा, लहान नगरपालिका-३ अस्पताल चोकस्थित बालाजी गेष्ट हाउस एण्ड होटेलमा साबिक सुनसरी प्रकाशपुर गाविस-५ बस्ने ४३ वर्षीय देवेन्द्र अधिकारी शनिबार मृत अवस्थामा फेला परेका छन् । अधिकारी साउन ४ गते देखि उक्त होटलको कोठा भाडामा लिई बस्दै आएको बुझिएको छ ।

त्यसैगरी काभ्रे, रोशी गाउँपालिका-९ चिउरीबाँस बस्ने ४० वर्षीया आरती लामा तेमाल गाउँपालिका-८ पानथलीस्थित रोशी खोलाको बगरमा शनिबार मृत अवस्थामा फेला परेकी छिन् । यस सम्बन्धमा प्रहरीले आवश्यक अनुसन्धान गरिरहेको छ ।