देशका विभिन्न स्थानमा भएको सवारी दुर्घटनामा तीन जनाको मृत्यु भएको छ । जाजरकोट, भेरी नगरपालिका-६ गंजस्थित सडकमा ग.१ ज ७७११ नम्बरको बोलेरो जिप सडकबाट करिब ४ सय मिटर तल खसेर मंगलबार दिउँसो दुर्घटना हुँदा जिपमा सवार दुई जनाको मृत्यु भएको छ ।

दुर्घटनामा चालक भेरी नगरपालिका-६ गंगटिया बस्ने ३५ वर्षीय मान बहादुर वलीको घटनास्थलमै र दुर्घटनामा गम्भीर घाइते भएकी जिपमा सवार सोही नगरपालिका-६ बस्ने ८० वर्षीय कलिमान खत्रीको कर्णाली प्रादेशिक अस्पताल सुर्खेतमा थप उपचारको क्रममा मृत्यु भएको हो ।

साथै दुर्घटनामा घाइते भएका जिपमा सवार अन्य १३ जनाको जिल्ला अस्पताल जाजरकोटमा उपचार भइरहेको छ । त्यस्तै मोरङ, धनपालथान गाउँपालिका-६ गदिया पुलस्थित सडक छेउमा पार्किङ गरी राखेको प्र.१-०२-००३ त १२५५ नम्बरको ट्याक्टरमा बिआर ११ एच ७६६८ नम्बरको मोटरसाइकल ठक्कर खाई मंगलबार बेलुकी दुर्घटना हुँदा मोटरसाइकल चालक सोही गाउँपालिका-७ कमलपुर बस्ने ४० वर्षीय बिनोद बहरदारको मृत्यु भएको छ ।

दुर्घटनामा गम्भीर घाइते भएका उनको गोल्डेन अस्पताल बिराटनगरमा उपचारको क्रममा मृत्यु भएको हो । हाल फरार ट्याक्टर चालकको प्रहरीले खोजी गरिरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।