देशका विब्भिन्न स्थानमा भएको सवारी दुर्घटनामा तीन जनाको मृत्यु भएको छ । चितवन, खैरहनी नगरपालिका-८ स्थित बाबा पेट्रोलपम्प नजिक सडकमा बा.प्र.०३-००३ प ६३७ नम्बरको मोटरसाइकल अनियन्त्रित भई गएराति दुर्घटना हुँदा चालक लम्जुङ घर भई चितवन रत्ननगर नगरपालिका-१५ खोलेसिमल बस्ने ४३ वर्षीय हेमन्त कुमार श्रेष्ठको मृत्यु भएको छ ।

दुर्घटनामा गम्भीर घाइते भएका उनको नयाँ मेडिकल कलेज भरतपुर चितवनमा उपचारको क्रममा मृत्यु भएको हो । यस्तै कैलाली, घोडाघोडी नगरपालिका-४ भालुफाटास्थित सडकमा से.७ प ७६०१ नम्बरको मोटरसाइकलको ठक्करबाट पैदलयात्री हाल नाम, थर, वतन नखुलेका अन्दाजी ५० वर्षीय पुरूषको आइतबार राति मृत्यु भएको छ ।

दुर्घटनामा गम्भीर घाइते भएका उनको प्रादेशिक अस्पताल धनगढीमा थप उपचारको क्रममा मृत्यु भएको हो । साथै उक्त मोटरसाइकलमा सु.प.प्र. ०१०११ प ७४६९ नम्बरको मोटरसाइकल समेत ठक्कर खाई दुर्घटना हुँदा घाइते भएका दुवै मोटरसाइकलमा सवार चार जनाको घोडाघोडी अस्पताल सुख्खडमा उपचार भइरहेको छ ।

यस्तै सिराहा, सुखिपुर नगरपालिका-१० स्थित सडकमा प्र.२-०१-००१ त ०७८४ नम्बरको ट्याक्टरको ट्रलीबाट लडेर सुखिपुर नगरपालिका-१० बस्ने १९ वर्षीय बिवेक ठाकुरको आइतबार दिउँसो मृत्यु भएको छ । दुर्घटनामा गम्भीर घाइते भएका उनको न्युरो अस्पताल बिराटनगरमा उपचारको क्रममा मृत्यु भएको हो ।

साथै ट्याक्टरको ट्रलीबाट लडेर घाइते भएका अन्य एक जनाको सोही अस्पतालमा उपचार भइरहेको छ । प्रहरीले हाल फरार ट्याक्टर चालकको खोजी गरिरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।