मृत अवस्थामा देशका विभिन्न स्थानबाट छ जना फेला परेका छन् । ललितपुर महानगरपालिका-२४ धापाखेल नखुडोलस्थित जस्ताको टहरामा बस्ने ३६ वर्षीय शसिकला राई आफ्नै टहरा भित्र बिहीबार मृत अवस्थामा मृत फेला परेका छन् ।

त्यस्तै महोत्तरी, मनराशिश्वा नगरपालिका-५ स्थित दशगजाक्षेत्रमा भारत सितामाढी थाना सोनवर्षा भुतही-१२ बस्ने ३५ वर्षीय रबिन्द्र साह बुधबार मृत अवस्थामा फेला परेका छन् । यस्तै पाल्पा, रम्भा गाउँपालिका-५ बाकुम बस्ने ५९ वर्षीय केसरसिंह गाहा सोही ठाउँस्थित बाटोको नालीमा बिहीबार मृत अवस्थामा फेला परेका छन् ।

उता धनुषा, नगराईन नगरपालिका-२ नगराईन चोकमा हाल नाम, थर, वतन नखुलेका अन्दाजी ७० वर्षीय पुरूष बिहीबार मृत अवस्थामा फेला परेका छन् । यता पर्वत, कुश्मा नगरपालिका-८ दोविल्लामा हाल नाम, थर, वतन नखुलेका अन्दाजी ६५ वर्षीय पुरूष बुधबार मृत अवस्थामा फेला परेका छन् ।

यसैगरी रूपन्देही, बुटवल उपमहानगरपालिका-११ स्थित तिनाउ नदीमा हाल नाम, थर, वतन नखुलेका पुरूष बुधबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको छ ।