नवकान्तिपुर संवाददाता
काठमाडौं, १८ भदौ ।
सुनसरी, धरान उपमहानगरपालिका-१३ निसानेबाट अवैध लागूऔषध गाँजा करिब ९८ किलोग्राम सोमबार बिहान प्रहरीले बरामद गरेको छ ।
सोही उपमहानगरपालिका-१३ आँपगाछीमा अस्थायी प्रहरी चौकी अमरहाटबाट खटिएको प्रहरीले धनकुटाबाट धरानतर्फ आउँदै गरेको बा.११ च ५९४३ नम्बरको कारलाई रोकी जाँच गर्न खोज्दा कार नरोकी भागेको र सोही ठाउँस्थित निसानेमा कार छाडि चालक फरार भएपश्चात प्रहरीले कार तलासी गर्दा डिकिमा ४ वटा बोरामा रहेको उक्त गाँजा फेला पारी बरामद गरेको हो ।
प्रहरीले हाल फरार कार चालकको खोजी गर्नुको साथै यस सम्बन्धमा आवश्यक अनुसन्धान गरिरहेको छ ।
