देशका विभिन्न स्थानमा भएको सवारी दुर्घटनामा दुई जनाको मृत्यु भएको छ । ललितपुर, ललितपुर महानगरपालिका-१० हनुमानस्थानस्थित सडकमा बा.८७ प ९१७० नम्बरको मोटरसाइकल अनियन्त्रित भई बिहीबार बिहान दुर्घटना हुँदा मोटरसाइकलमा सवार ललितपुर महानगरपालिका-१५ सातदोबाटो बस्ने ३१ वर्षीय ऋषी कुमार पाठकको मृत्यु भएको छ ।

दुर्घटनामा गम्भीर घाइते भएका उनको सुमेरूसिटी अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकलाई थप उपचारको लागि बिएण्डबी अस्पताल पठाइएको छ ।

त्यस्तै सर्लाही, मलंगवा नगरपालिका-७ मुसैलीस्थित सडकमा खुटौनाबाट मुसैलीतर्फ जाँदै गरेको ना.३ त १६२ नम्बरको ट्याक्टर अनियन्त्रित भई नहरमा झर्दा उक्त ट्याक्टरको ठक्करबाट नहरमा माछा मार्दै गरेका सोही ठाउँ बस्ने दिनेश साहको छोरा १२ वर्षीय रवि साहको बिहीबार बिहान मृत्यु भएको छ ।

दुर्घटनामा गम्भीर घाइते भएका उनको सिटी अस्पताल निजगढ बारामा उपचारको क्रममा मृत्यु भएको हो । साथै उक्त ट्याक्टरको ठक्करबाट घाइते भएका अन्य तीन जनालाई थप उपचारको लागि एलएस न्यूरो वीरगंज रिफर गरिएको छ । ट्याक्टरका चालक र सहचालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।