अफगानिस्तानको पूर्वी वर्दक प्रान्त र पश्चिमी हेरात प्रान्तमा साँझ भएका दुई छुट्टाछुट्टै सडक दुर्घटनामा कम्तीमा छ जना यात्रुको ज्यान गएको छ भने अन्य आठ जना घाइते भएका छन् ।

राजधानी काबुललाई दक्षिणी कान्दाहार प्रान्तसँग जोड्ने राजमार्गमा शुक्रबार साँझ कार पल्टिँदा तीन जनाको मृत्यु हुनुका साथै महिला र बालबालिकासहित सात जना घाइते भएको प्रान्तीय प्रहरीका प्रवक्ता मोहम्मद युसुफ असरारले जानकारी दिनुभयो ।

असरारका अनुसार घाइतेहरुलाई अस्पताल भर्ना गरिएको र उनीहरुको अवस्था गम्भीर रहेको छ । हेरात प्रान्तको इस्लाम कला राजमार्गमा भएको यस्तै घटनामा तीन जनाको घटनास्थलमै मृत्यु भएको र एक जना घाइते भएको प्रान्तीय प्रहरीले जनाएको छ ।

स्थानीय प्रहरीका अनुसार अफगानिस्तानमा यस्ता दुर्घटनाहरू प्रायः सडकको खराब अवस्था, चालकको लापरवाही वा यात्राको क्रममा सुरक्षा उपायहरूको अभावमा जोडिएका हुन्छन् ।
—